الكدب باين علي الوشوش مكشوف
وانا شوفت ياما ولسه بردوا بشوف
قالوا البشر متقسمين لنوعين
وانا شوفت نوع خارج عن المألوف
ناس كدابين مانفعش فيهم لوم
ناس بياعين بيبانوا يوم ورا يوم
ناس رغم كل اللي اتعمل عايشين
وسط الجميع بس بضمير معدوم
وانا زي خيط ناعم حرير عارف طريقه منين
يقدر يكون رابطك سعاده ويقسمك نصين
وعنيك ماتقدر تملكه ولا حتي تقوي عليه
اخرك يادوب تتمني لو تلمحه بالعين
ماشيه السنين وانا حالي مش هو
عامله البريئه الهاديه من جوا
خبيت كتير القسوه والجبروت
وداريت في عيني الشر والقوة
موجوعه جايز بس مش قايله
عديت مراحل في الوجع هايله
مابقتش اخاف مانا ياما شوفت الموت
ايدي اتلوت لكن بقيت طايله
وانا زي خيط ناعم حرير عارف طريقه لفين
يقدر يكون رابطك سعاده ويقسمك نصين
وعنيك ماتقدر تملكه ولا حتي تقوي عليه
اخرك يادوب تتمني لو تلمحه بالعين
