من صبر طال وطال معاة انتظارى, لعجوز بتبكى عكست عليا انكسارى
لقصة غامضة بتحكى توصف ليكم الى سارى ,سطور معارضة بحبر شاى من القهاوى
سكت راضى ولعبت دورى فى الطابور , وقفت هادى علشان اعيش وسط النسور
لو قلت كلمة فى لحظة اكون ورا العيون ,عيون فى الاصل عميت سابت طريق النور
بأمر آمر امروا عليا اكون مأمور , ولدونى حر لكن الحر ملوش مكان
وقلت حاضر ونويت فى نفسى اكون جبان ...عادى عادى ده حال شعوبنا من زمان
رضيت بهمي وهمي مش راضي بيا , وفضلت ساكت لكن عيون نسور عليا
شافونى قالوا ده حلو اهوه وميه ميه, وجوا نفسى نفسى كانت تصعب عليا
من صبر طال وطال معاه انتظارى , لعجوز بتبكى عكست عليا انكسارى
فـ قصة غامضة بتحكى توصف ليكم الى سارى , سطور معارضة بحبر شاى من القهاوى , جماعة واقفة بتقول حلول لوضع حالى ,عمرى ما كنت خايف ولا خوف لقلبى عارف , لكن زهقت شايف ... شايف خلاص كفاية, كفاية عنصرية, كفاية طائفية, كفاية دولة متدنية فى حالتها المادية, كفاية عمر فاضى , كفاية شعب راضي , كفاية علم هايف كفاية شاب خايف , كفاية حزن فى القلوب فضيت جيوب
ده واطى عالى مش مهم ادفع وفوت !
دى خلق عايشة بالاسامى على الكروت من كتر ما انت عارف...عملك خايف تموت , ومن العذاب كفاية ليك ملهاش وجود
