(ڤ١) لسه زي مانا بفكر وانا صامت
حاولت انشن الف مره ولا صابت
بجري واسبق كل الناس فلاقي حائط
مفيش بيني وبين الحياه دي اي رابط
كل مااجي اخطي خطوه تبقي صدمه
خيوط كتير في ايديا بس مش لاقي لضمه
افكار مابتترتبش فبتحصل مصادمه
والذكريات بتاكل فيا لاخر قطمه
ويييت العمر عدي خلاص حسيت
ربع قرن عدي عليا قفلتوا الgate
حاولت احب اكتر من مره فاتأذيت
حرقت كل مشاعري خسرت واتنسيت.
(ك)شربت المر كله خلصت الكوباية
لسه معايا شوية حظ اراهن بيهم ع النهاية
مش بسهوله هرمي الماضي ده كله ورايا
القصه جامده جدا ناقص اسم يشدك للرواية.
(ڤ٢) الاوضه الضلمه والدخان مش اختياري
الدمع مش بيبان عشان اسير هزاري
الكل لما بعدت قرروا اختصاري
فطبيعي لما رجعت ان تطولكوا ناري
ثمار الكره طرح بذره الخزلان
عمرك ماهتزرع شوك وتلاقي زهور بستان
مش كل الصور دخلت فولدر النسيان
الضحكه ليها طعم لما تكون كسبان
فاات كتير علي رقصتنا الاخيره
كنتي ساعتها لسه عيله بضفيره
بس كنت بحس معاكي حاجات كتيره
كنت مادد لك ايدي قوليلي ليه سبتيها
(ك) شربت المر كله خلصت الكوباية
لسه معايا شوية حظ اراهن بيهم ع النهاية
مش بسهوله هرمي الماضي ده كله ورايا
القصه جامده جدا ناقص اسم يشدك للرواية.
(ڤ٣) القلم رفض كتير يكتب كلامي
والالم بيبان للناس حتي في سلامي
ماتفكروش هدوئي ده معناه انهزامي
دي لحظه السكون ماقبل التسونامي
الفرق واضح سهل تشوف الاختلاف
اصبحت واعي كفاية لما كتبت بجاف
ماتخشش حرب فيها مراحل استنزاف
الدنيا مابتديش غير واحد عمر قلبه ماخاف
كان ياما كان وافهم معني الحدوته
غمضت عيني عشان حسيت انك مبسوطة
فتحت بقيت لوحدي وانتي مش موجوده
رجليا وقفت رغم انها مش مربوطة
توتة توتة كده خلصت الحدوتة
توتة، توتة توتة كده خلصت الحدوته.
