نِفسي انام .. انا كل صحابي باعوني من ايام

مش برتاح اصل التعب اللي فيا ميوصفوش كلام

100 نغزة في كل نبضه .. مرعوب و في قلبي قبضه

حكيتلك امبارح على اللي سابوني و سيبتني النهارده

عاشرت كلاب إديتهم عمري و خدت عضه

كنت اطلب من الدنيا الفرحه و دايماً كانت رافضه

متعكنن .. على قد حُزني مكنتش حابب ابيِّن

النكد لو ساب قلبي مش هيلاقي حُضن حنيِّن

دقيت وَشم السعاده عشان اكون من الفرحانين

و إتعودت اضحّك كل الناس " بلياتشو لكن حزين "

زقوني تحت قضبان قطر حياتي و إتفرمت

معادتش في قلبي " فرحه " زي ما يكون انا إتفرمط

" نكدي " .. لكني بتفرحني اقل حاجه

كنت معاهم عـ الحِلوه و عـ المُره و بعدوا وقت الحاجه

بعدت عن كل اللي نفعني و حبيت شئ مُضِر

كل اللي قطموا ضهري انا كنت عامله ليهم جِسر

مشوفتش سعد بجد من يوم ما إتولدت

تعبت من العَد في جرح يجُر جرح انا إتقتلت

وقت اما بنيت للفرحه بيت لقيته إتهد

انا كنت " ولي النكد " عمري ما كنت ولي العهد

مَتحِبونيش انا مش جميل و مَليش مزايا

نسيوني و رموني و بعدوا عني و خدوا عزايا

نسيانهم صعب أكيد مش هنسى و لو بـ ألف چوب

حسسوني إني كنت بشحت منهم الحُب

صُب يا عم صُب شربت بس فوقت حلمت بـ حُضن

و صابني الحُزن و قالوا على عياطي " مُحن "

كله بان على اصله و للأسف حتى إنتي بينتي

صعبت على كل اللي حكيتله و مَصعبتش على بنتي

كنت دايماً اسأل على حالك و توحشيني

انا منيمتش بالليل , بس الليل نام تحت عيني

كان نِفسي تحِبيني .. كان نِفسي تبقي ليا

مُرتبط بـ ذكرياتك و إنتي مش مُرتبطه بيا

عملت إيه وحش في حياتي عشان يترد فيكي !؟

مرتاحه إزاي في حُضنه و حُضني كان اللي مدفيكي !؟

فضلت متبت فيكي ياللي بعدتي و سيبتي إيديا

وعد .. إن أنا بكره هخليكي تحلمي تسلمي عليا

مشوفتش سعد بجد من يوم ما إتولدت

تعبت من العَد في جرح يجُر جرح انا إتقتلت

وقت اما بنيت للفرحه بيت لقيته إتهد

انا كنت " ولي النكد " عمري ما كنت ولي العهد