مسحراتي وعيال وحاره

والواد حماصه، طفَّى السُجارة

والفجر واقف، يُصلُب ف طوله

والذنب هايِب، لحظة وصوله

والعاصي شايل، دمعة وتوبه

ف عنيه مُراده، عشمان ينوله

طوّل غيابك، وف ضهر بابك

هلُّو الحبايب

والضحك طايِف، ويّا القطايف

والوقت سايِب

وعم طه، نَفسُه عصاها

ونِزِل يباصي

إلعب يا سيكا، ارفع يا ويكا

واحدة براسي

وابويه نازل، شاف المهازل

مغلوب بفوره

وجيرانا طهقوا، من صوتنا زهقوا

ما كفايه كوره

والنقشبندي، صوته اللومندي

صحى الطيور

والناس زَحَامة، ع القدره يامَه

وقت السحور

والشمس طالعه، تلعب مصارعة

وعطشنا غالب

والجوع أتانا، لكن لَقَانا

بابنا موارب

فوانيس وزينة، لفُّوا المدينة

وشارعنا نادي

وقعت دروسي، لكن فانوسي

ف ايدين ولادي