[اقتباس 1]

هي الحياة اصلاً عشوائية يعني طريق زحمة و مليان مطبات الناس لازقة ف بعض و كله بيزق عشان يوصل الاول و هو مش عارف هيوصل لايه بس لازم يوصل فغصب عنك بتلاقي دماغك عشوائية زي حياتك و مع اول مطب بتواجه المرحلة الاولي و فجأة تلاقي نفسك بتقول

[المقطع الأول]

مش موافق ارضي و ابقي تافه كافر بالفكرة

أو موافق لكن فاهم يعني بنافق الفطرة

بدافع و بحدة عن الجوانب الستة

الهدوء و الراحة و السلام و الرضا و الفخر والذكري

مش اللي هسيبها لأ اللي بفتكرها

و أنا مسافر مع ضوء خافت و غنوة حلوة

عارفين كشاب ف سن العشرين أنا اربعيني ممل

عازب روتيني حتي ف العلاقات مقل

طافي اللمبة و بحتفل بعيد ميلادي

حسن الأسمر ماضيلي علي كتاب حياتي

و حكاياتي بتلف ف دماغي محبوسة جواها

بتصرخ كل يوم ارجوك طلعنا من دماغك

اظن كفاية كده اقلبلكو الشريط

اصل من كتر المشاعر دي افتكرتني شيرين

و طريقي مش متسفلت ، طبيعي و مش متستف

بس بهد كل هضبة عشان صريح و مش متأسف

ومش بعترف بالابراج

ولا مطرب المراهقات

ولا أرجوزات السوشيال ميديا ولا حاجات كتير

القائمة دي لانهائية زي باظ يطير

حياتي فيلم مفيش علي التتر حد

الفانتا الاتنين لتر مش اتنين لتر بجد

بتحوم الافكار طيارة بالآلي المدمر

برجين ف دماغي انفجروا 11 سبتمبر

[اقتباس 2]

وعند النقطة دي بالزبط بتكتشف إنك مش مضطر تمشي في الشارع الزحمة ده و ان كل اللخبطة اللي ف دماغك دي انت اللي عاملها و انت اللي تقدر تسكتها ...علي فكرة هتفضل الدنيا ترخم عليك برضو زي بالزبط لما

[المقطع الثاني]

طعني الحظ ف قلبي بسكينة و صحيت م الموت

علقته ع المشنقة لقبوني جون سنو

هنا الناس قتيلة الديد ارمي ميشغلنيش

بموت ف المزيكا فانا مش محتاج اعيش

واقف ع الطريق مكمل للآخر

عملت مع البيت انا مقطع ساخن

فا بلاش حماقة ياد يا إم سي ترجيع

انا الطاقة إم سي تربيع

بشق جدران الظروف اعتبره إنفجار ذري

يا ورقة سجلي الحروف اعتبريه امتحان ..ذاكري

ولسه بجري ..كتفي ف كتف مجدي

عشان مبيتلحقش بسهولة و مش لسه بدري

سايب صفحتين فاضيين ف نهاية كتاب حياتي

أنا قتيل بلوت تويست تغير المسار نهائي

لحد ما حد فينا يرتاح اديني يا دنيا قاعد

بنعيش اكتر من مرة بس الخط الزمني واحد

[اقتباس 3]

و لو الدنيا رخمت عليك , يعني رخم عليها انت كمان , و عشان كده أنا بقي ..

[اللازمة]

ماشي ع الطريق مكمل للآخر

عملت مع البيت أنا مقطع ساخن