حكاية حبنا قصه على معنى على عنوان ......
رسمها طيفه العابر حكايه حيل مجنونه
زرعنا بالأمل بسمه تصارع قاسي الاحزان.....
نصور من مشاعرنا كلام الحب وفنونه
رسمنا بالغلا لوحه نسيج ألوانها الوجدان .....
على الذكرى على الماضي دروب الشوق مصيونه
نقشنا بالصخور اسما كتبنا بالورق خلان ....
حروف اسمه وسط قلبي وحرفي صار مضمونه
طوينا للجفا صفحه فتحنا للوصل بيبان ....
على رغم الحسود اللي يكن الشر وضنونه
ظلام الليل لو يقبل ويسقينا الزمن حرمان ....
على عهد الوفا نبقى ولو لرواح مسجونه
شراع الحب متعلي يساير هزة الطوفان ....
غيوم الحقد لو تمطر هوانا ما اختلف لونه
نسابق عصرنا الحاضر ولو هو ثاير البركان ...
نسطر بالحروف احلى قصيدة حب موزونه
رياح الوجد لو هبت تخالطها الزهور الوان ...
تجدد كل ما فينا تهيض اشواق مدفونه
عروق قلوبنا حيه بكيته والدموع اشجان .....
وهو في ليله الساكن حقيقه تبكي عيونه
عصافير الوله غنت من أسباب الوله الحان ....
تقاسيم ٍ لها يبكي حبيب ٍ راح مضنونه
حكاية حبنا دمعه سكبها العاشق الولهان ...
وجرح ٍ ماقوى يبرى طِعن برماح مسنونه
كلمات الشاعر ظافر المنصوري
