ف الشدة بنشوف الاصلي
م الفالصوا ونعيد حسبتنا
في ناس ماكناش نعرفهم
كانوا ضهر لينا ف شدتنا
وناس تحزن يا خساره
فاكرينهم اقرب من روحنا
في الشدة نسيونا وحتي
ما اترحموش في طلوع روحنا
هزار وضحك و خد عندك
اونطه ولمه كدابه
اخلاص وحب واخرتها
الطيبة وصلت لخيابه
نداله وغش عيني عينك
لا واللي ذاد الطين بالا
لو عملوا موقف حلو زمان
بيعايرو بيه ويصبح زله
من اول السطر هنبدأ
ونشد خط علي الماضي
واهي يلا دنيا وبتعلم
يمكن نفوق المرادي
ايام بتجري ومين عالم
ايه اللي ممكن يجرالكم
رساله ليكم يا تفوقوا
يا الكل راح يبعد عنكم
هي المواقف بتأكد
مين اللي فعلا ابقالك
فمتضايقش وتتنكد
خساره لو تشغل بالك
كام غلطه وانت بتتحمل
وتقول اكيد بكره يفوقو
وانت اللي في الطيبه مكمل
وهما في الغل يسوقو
ركز بقي وحدد ناسك
قرب من اللي بيستاهلك
بطل تطاوع احساسك
اتجاهل اللي بيتجاهلك
القصد م اللي باقولهولك
زمن العشم راح من مده
عملت خير مين شالهولك
والله يخليكي ياشدة
