حاسس شئ غريب

حابس عقلي في أوضة ضلمة

عيشت طفولة نور و حد فجأة كسر اللمبة

عقلي بيخوني و رافض يبتسم

fake راسم ضحكة

و من جوة بيتقسم

ماشي بهرج

وسط كل اللي بيتفرج

بحاول أقنع عقلي أنه بس يتحرك

بيقولوا أني فايق راكب الهزار و سايق

مع أن جوة عقلي مضلم

وممثل أني شايف

البعبع خاطفني

ومحدش ساءل فيا

كيمية مخي ضربت

و سيادته طالب فدية

البعبع مرض مش حالة عرض

و كأنه فجأة جوه مخي سيطر و أتفرض

ببكي من جوايا و حاسس بالشلل

عندي أتنين صحاب

الحزن و الملل

بحس أني منمل

مخنوق و مهمد

كأني عجوز ماشي بيتسند

فاقد الشغف

بحن للشغب

تاهت مني طموحي

و مش عارف السبب

بخاف مالموت مع أن راحتى فيه

جوايا ألف صوت بيسأل فيا إيه

نفسي أفوق

نفسي أروق

نفسي من الفرحة أدوق

نفسي أرجع تاني صغير أحس أن في حياتي ضوء

مش سايب

بحارب فمتقولوش ده خايب

عشان شفت في حياتي

أكتر من السبع عجايب

حاسس بغربة مع أني موجود

بصرخ في نفسي يمكن أفوق

خايف أصارح حد بالجوايا

هينتقدني ساعتها و هتبقا النهاية

هيقولي كاني و ماني

و مش هيقدر حالتي

هيعمل فيها شيخ

أو هيعمل فيها خالتي

الإكتئاب مش إختيار ممكن ترفضه

مش عادي متبقاش سادي و أوعاك تنقضة

سيبونا في حالنا البعبع جالنا

في منكم شال الهم بس احنا الهم شالنا

و مش بالطبطبه بنقدر نفوق في عركة في مخنا

بين اتنين في سوق