ابتدى ليلي على حب وعناق
وانتهى ليلي على صد وهجر
من رحل والدار عقبه ماتطاق
قلبي الولهان عايش منتظر
عام الاول في محبتنا وثاق
لو يطول العمر يبطي ما انبتر
ياحبيبي جيت لك مكسور ساق
واحسب انه في لقاكم ينجبر
كنت احسب انك تجيني باشتياق
مادريت انك تدورلك مفر
والغياب الشين منه الصدر ضاق
وأخرة فرقاك نفسي تحتضر
لحظة الفرقى مرارتها تذاق
تكسر الخاطر وتملاه بكدر
الحقيقه تحرق القلب احتراق
يوم انا ناظر لقاكم من عمر
ونبني احلام العمر بعد الشقاق
ويجبر الخاطر مع وصلك جبر
كن حزني له مع القلب اتفاق
لو تصنعت الفرح بين البشر
بلغوه القلب من فرقاه ذاق
ضيقةٍ تجرح وتقهر بالصدر
الوكاد ان كان طوّل بالفراق
انتظار الوصل احر من الجمر
كنت اظنه بالوعد ناوي يجيني
وكنت اظنه والله اني كنت اظنه
وزاد في هجره ولا شفته بعيني
واقتنعت ان الجفاء لابد منه
