لما امشي متبكيش

جسمي هيموت بس روحي هتعيش

ممكن توصل للجنه او للنار ومتمشيش

كل اللي نفسي فيه انك متنسانيش

لما امشي متبكيش

انا عشت كل نفس فيها من اول ما جيت

عشت فيها ايام حبيت واتحبيت

ياما ضحكت فيها ياما وياما بكيت

من زمان لما كنت بخاف من الضلمه وبحب النور

لما كنت طفل بيصلي قبل ما الشياطين ياخدوه

قبل ما ابيع نفسي للدنيا والبس فوق وشي وشوش

قبل ما السواد يملي قلبي لدرجه اني محسهوش

يوم اسود وكئيب

مطر طول اليوم والغيوم مش بتغيب

طول عمري بمشي حياتي بالترتيب

اول مبدأ لو بتخاف من الموت مش هتقدر تعيش

كل حاجه بتتغير هيجي يوم والكل هيمشي

مهما كان الحزن هتنسي

مهما كانت الحياه ايه كل حاجه بتعدي

كان نفسي حد غيري يثق فيا

كان نفسي في الاحلام اللي مجتش ليا

كان نفسي الدنيا متتغيرش وتفضل هيا هيا

كان نفسي مخسرش قلبي ولا النفسيه

كان نفسي محسش كتير كان نفسي محسش خالص

كان نفسي ابص للنص المليان حتي لو كان ناقص

سنين كتير في النازل ياتري الدنيا تستاهل؟

سلام من قلبي لعالم يمكن فيه نتقابل