العوق الصفوفو رهاب
أنا قاعد ليو ملازم الباب
الدايرني اليجيني عديل
فوق صهوة سروج و ركاب
و طي الراحتو موج وعباب
قطر الموت بجيك يا خي
شايل المر مسوح و شراب
ما القالولي أوخ لجيت
وفوق السادة ما اتحويت
داير البجي ضحي هجام
والبتضرع العنسيت
حنضل قوز ومر يا خي
ومحور للبطبو الكي
الخلى الرجال تنماص
أنا قاعد لي و خلف كرعي
زيد النار ضرى و تحميش
و جيبهم وقفهم لي نيش
مني يعقرن الحروم
قلع الضفر ونتف الريش
دوت صاقعة صن البوم
الباب الفتحو جابلو سموم
ريقت الضحى شراب الغل
حر .. البغلي و الزقوم
ضرب الوجن أنا القدام
تعال يا خي دواس و لطام
ضرب القفا دشورة الدم
ضايار للرجال كزام
إن في اللعبة حر بطان
وقوقا ورزم الكروان
ضرب السوط دفا وحميس
مشق القرضة و القطران
الزحف مجرجر و صوت الرعد يكركر
ما بدورلي مشكر يا جنا
السودان بخيرو فيهو رجال بغيرو
وكتر ألف خيرو يا جنا
الخميس عرمرم عبا وجاني اتخمخم
مبسوط غير مسجم يا جنا
الجخاخ بفرزو ، ابرزو لي و انفرزو
والباقين يفزو يا جنا
بينو لي في النقعة ما بتنفش الوجعة
معاي وقعتو وقعة يا جنا
