دخلَك شو لونا الكوفيّة

فوق الراس اللي تهَشَمّ

ما عادِت بيضا ولا سودا

الكوفيّة غرقاني دم

يا عَدوّي جنودَك خبرهُن

رح يشربو من نفس الكاس

ولادي كنت مبارح غامرهُن

واليوم معبّيهُن بكياس

بتقتُل إمّي بيصمُد بَيّي

بتقتُل إختي بيصمُد خيّي

أنا طفلي بيرضع حريّة

لو نشّف حليب الإم

أنا ديني فَلَسطيني

ما في قوّة بتبَكيني

هيدي أرضي وهيدا عرضي

وغدرَك أكتر بيقوّيني

لا بدبابة ولا بطيارة

رح تهزم طفل الحِجارة

بدي قاوِم ما رح ساوِم

حب الوطن بشراييني