ستل جناحه ثم حام يرقى على متن الهوا
يزفه بعيدٍ وانا محدود في حد النظر
له بالهوا شف ومرام يلعب مع الغيمه سوا
ولا جناح لي واطير والأرض صارت لي مقر
طيري ضرب جو الهيام ولو دعيته ما التوى
عزي لمن طيره غدا ولا له من امره مفر
فكري تغشاه العسام أمسيت وفكري ما ضوى
الأرض قفرِ من الونس والليل من فرحي قفر
شبيت ضوي بالظلام في صحصحٍ ذيبه عوى
ما لي أنيس الا النجوم أو نور وضاح القمر
خالي و كني في زحام قلبي تلهب وانشوى
ما عاد اميز بالحشى والا على الضو الجمر
وين انت يا داعي سلام وين انت يا بايع دوا
ردولي النومه ترى بالعين جلاد السهر
دورت بالشده حزام ولا لقيت اللي قوى
يالله دخيلك ما لقيت اللي نشد به الظهر
