سامحني
ما عم اقدر زورك عالقبر
ما عم اقدر اتخيلك غير شامخ متل الجبل
ما عم اقدر اتخيلك مدفون تحت الارض
ما عم اقدر اني صدق
ان هاد الفرض انفرض
انت لساتك عايش جوا قلبي
للحظة حاسس حالي عم احلم يشهد ربي
انك قربي ما بتفارقني ولا بتغيب عن عيوني
للحظة ما بتخيل غير ايديك يدفنوني
حاسس انك سافرت
عن عيوني بعدت
كياني بكل المعاني بقلي لحضنك اشتقت
مشتاق ضمك لصدري
ابكي على صدرك
اشكيلك همومي تساعدني فيها و استشتيرك
و اقلك يا ابوي انت اغلى ما في الكون
بعدك عني زاد علي هموم فوق هموم
احساسي عم يقلي انك رح ترجعلي بيوم
ترجعلي الامل و من الفرحة طير فوق الغيوم
يا ترا رح الاقي حدا حطه بمحلك
يا ترا رح الاقي حدا يحن علي متلك
يا ترا رح يعدي علي كون نسخة عنك
الله يقدرني ارفعلك راسك كوني ابنك
من لما وقعت قدامي
اندفنت كل احلامي
تحطمت امالي و طموحاتي والاماني
انت تاج راسي ابوي خيي و صديقي
انت يلي كنت واقف معي من بداية طريقي
كيف تستشهد قدامي ما سألت على احساسي
ليش خليتني شوف هالمشهد يا أغلى من كل ناسي
انت عارف هالمشهد ما عم يغيب عن بالي
عارف اني ببكي كل يوم و دمعي عندك غالي
يا غالي انا عايش غريق بأحزاني
ما عم انسى كيف وقعت على الارض قدامي
بلحظة انكسر قلبي انسطل عقلي ما سألت عشي
غير ضم صدري لصدرك لفك احضنك و ابكي
لما صار دمك تحت راسك اكبر من حجمك
شفت رقبتك مفلوعة عرفتك رحت ودعتك
قلت يمكن ما رح اقدر كمل حياتي وياك
بس رح حاول قضي عمري عم خلد لك ذكراك
يا ترا رح الاقي حدا حطه بمحلك
يا ترا رح الاقي حدا يحن علي متلك
يا ترا رح يعدي علي كون نسخة عنك
الله يقدرني ارفعلك راسك كوني ابنك
بلحظة استشهادك
حسيت قلبي انكسر
ما شعرت بهالاحساس طول مالي عايش بهالعمر
بلحظة اختل توازني ضغطي ارتفع مدري نزل
انقسمت نصين جسدي عن روحي عم ينفصل
وكل ما تذكرت هالموقف بحس بنفس الاحساس
بحس حالي بنفس اللحظة و المكان بالأساس
لثواني بهالاحساس بحس بتفاجئ لما برجع
بلاقي دموعي بالاراضي بدون اذن مني بتدمع
فلما غيابك كان بايدي ما خليتك عني تغيب
قلتلك يا بابا لا تتركنا لفيتني و بكيت
قلتلك ما بدنا مصاري بدنا انت تبقى حدنا
كان عمري خمس سنين قلتلك انت تاج راسنا
بس غيابك هالمرة و انا عمري عشرين
ما هو بايدي هلق بس بايد رب العالمين
انت طلبت الشهادة و لأن بحبك لباك
ربك احن منا عليك بس نحن ما رح ننساك
لا ما رح ننساك
يا ترا رح الاقي حدا حطه بمحلك
يا ترا رح الاقي حدا يحن علي متلك
يا ترا رح يعدي علي كون نسخة عنك
الله يقدرني ارفعلك راسك كوني ابنك
