يطيح جفن الليل واهـــز كتـــــفه
نجم يشــع وبــاقي الليل مطفي
واحاكي الجدران عن وصف غرفه
مــاتشبه الجدران ويطول وصفي
ماهو حبيبي مورد القلب حتفه
وماهو حبيبي يفرح لوقت ضعفي
وتملــني الــجدران واظهر لشرفه
تحت السما واسكر الباب خلفي
ريــح تـــهب وتسكن العظم رجفه
وتموت ريح وتسكن اوراق نزفي
ياطاري الغدران والعمر رشفه
مع قلها ياليتها يوم تصفي
متى الشوارع تجمع اثنين صدفه
لاصــار شباك المواعيد مــــجفي
يـــابنت تو الليل مـــاراح نصـــفه
وياليل بعض اللي مضى منك يكفي
اللي اعرفه راح ماعاد اعرفه
ولاظن يذكرني الا اقبلت مقفي
