لا تكحلين العين يا قرة العين
مانيب ناقص من سواده حكايه
لقيت في رمشك حكاية محبيّن
الله كتبها بين .. داي ودوايه
خلّيه يحكي قصة الملح والزين
برعاية الله .. مايبي له رعايه
عينك بعيني وش بغيتي تقولين
في نظرتك ما للسوالف نهايه
تفضّلي بالسلهمه لا تشحّين
قلب ٍ يحبّك يستحق العنايه
حطبت لك من حدب الأضلاع ضلعين
ورزيتها لعيونك السود .. رايه
مشاعري جاتك قصايد دواوين
واللي بقى .. ردّيتها للروايه
تأخذني الغيره وانا خاطري شين
ما ودي ان الناس تبحث خفايه
من عودك المياّس وانتي تمشّين
خايف عليك من الحسد والوشايه
إمّا اجلسي بالبيت مثل المساجين
وإلّا ألبسي فوق العبايه .. عبايه
