دمشق وحلب
دقيت عالباب العتيق
ما ردوا
صار القلب
متل العشب
يعربش عالبواب
رجعت دقيت عالباب
ل حدّو
وقعدت وحدي بهاك
الصبح
انطر جواب
طل الزمن
خلف الدني
متل الندم
متل الألم
نطق دمعة وغاب
يا رب مش قصة عتب
بس كيف
بعد الفرح
لكان
بهاك الزمان
يرسم وجوه حباب
متل النغم
متل الطرب
متل دمشق وحلب
يصير اليوم
كمشة حزن تحت تراب
يا رب مش قصة عتب
بس الألم زاد
وجيران كنا
متل الأمل
صرنا بليل الفتن
شلحة دياب
نمت بفي لبقي
من ضحكات
مغبرة فوق الصور
معلقة فوق الشجر
لناس كانوا
بهالبيوت حباب
بفي لبقي منك انت
لملمت حالي ونمت
احلم بضحكة بنت
لما كنت
تحكي قصة صبي
صار خلف البحر
متل سراب
ورجع متل الفرح
متل حصان
بسهل الدني سرح
يرسم عوج البيت
اسم الصليب وزيت
باسمو واسم النبي صليت
وقلت ياريت
يرجع شي يوم
يلي غاب
شو قولك يا باب
رح يرجعوا الغياب
