الكلمات :

فاض الكيل صح؟ ، شايف دة في عنيكي

هاجازف واقول سابك شخص عزيز عليكي

متقلقيش .. حلك هنا بين اديكي

نقيلك وهم مناسب ليكي وهو هينسيكي

بس اوعي تأمني ب دمية عيونها بلاستك

اذ امنتي فعلاً بيها قد تمحيلك نفسك

يجوز تتحول لإدمان وتستنزف طاقتك

سمعتي التعليمات وانتي المسؤلة انا نصحتك

اسف مقدمتش نفسي .. القصة اكيد مش منطقية

انا كاتب يسمع عني واحد من كل خمسمية

شغال صبي بياع دمى بقبض كوابيس و هَم

مهموم بيعالج الْهَم واذكى غشاش اتخم

اتعودت اشوف هنا زباين بالدجل موهومة

بس دي كانت مقسومة مقتولة وجاية مهزومة

مخمومة آمنِت بالعِشق ، بطفولة كانت مفتونة

بَنِت من الوعود بيت ليها ، دلوقتي باتت مهدومة

------

بصت للدمية وشافت فيها طوق نجاتها

كانت اخده الضحكة واجهة تقول 100 شكوى جوا نُكَتها

مش من ضمن الموجودين عايشة ضيفة جوا حياتها

كاطفل مؤمن بالأبطال شافتها نهاية معانتها

لقيتها خلاص بتمشي ، واخده كل اهتمامي

كنت بحاجة اني اكلمها فاتعقد لساني

خفت اتهته او اتعلثم ، فاتخاف وتتحاشاني

فاهتجنب دة وكعادتي هافضل واقف مكاني

انا هفضل ديماً كدة مستني الحظ يميل

انا بتلاشى مفضلش مني الا القليل

كان ايه المستحيل في اني اتكلم معاها

عندي احساس بأن انا المسؤل ومش قادر انساها

-------

ممكن يموت احساسك ، يجوز يصدي نحاسك

ويمكن جداً حضن واحد يبقى ملازك

ممكن متموتش مجازف ومع النسيان تتحالف

بس مستحيل انك تصلح قلب تالف

مكنتش انت السبب .. بس اللوم عليك

تموت مقتول بسلاح عليه بصمات اديك

محاوط نفسك انت بناس مش موجودة معاك

عايش اجمل ايام حياتهم هما وبتنساك

الكون.. بيبعت لينا علامات

بالتأكيد دي رسالة واضحة ليا انا مش قدها

من ناحية تانية انا اتعلمت من الي فات

لازم الحقها منها انقذها من نفسها

عشقت ناس سيباها ومش اول واحدة تصدق

يميل الحظ والصدفة واشوفها تاني بحاله اسوأ

عزمت النية اني اتشجع واقوى وانطق

وصلت ليها وبدون بداية ببدأ

سيبي الي في ايدك دة كفاية اذية فيكي

خلاص حصل وانتهى دة الواقع اقبليه

للسة محبوسة في سجنك وعايشة جوا ماضيكي

فوقي وبصي لنفسك شوفي عامل فيكي ايه

شديت الدمية بقوى قامت حضنتها بأيدها

بصتلي بوش مكوي ودم مدمن للسموم

وقعت عالارض لما سلبت الدمية منها

هميت علشان اساعدها لقتني انا الموهوم.