بتعرف شو فكرت لما قلت بدك نبقى مع بعض للأبد؟
فكرت بالشامة الجديدة الي طلعت على كتفي
فكرت بالنجمة الي ماتت، ضوّا مش عم بطفي
فتحت ببلاد الغريب...
ضاع جوازي بتخت الإلفة
بتعرف شو فكرت لما قلت بدك نبقى مع بعض للأبد؟
فكرت بأوّل قلم حومرة شريته من نهريّا
فكرت بأحمد، كنت أحبّه، غرق في طبريّا
تذكرت ستي أوّل مرّة...
حكت أخوها بسوريّا
بتعرف لشو انتبهت؟
إنك بتعرفش
بتعرفش إنّي بدخّن
بتعرفش إنّي بتمنّى
إنّي بدّي تاتو حقيقي
مش رسم بالحنّا
بتعرف شو تذكّرت؟
تذكّرت إنّي بنسى
إنه البحر لوسيع
محبوس بحبل المرسى
تذكّرت ملان أشياء بعرفها
وإنت بتعنيكاش
تذكّرت إنّك شخص
بعده بصوّر مع فلاش
ونسيت أضحكلك
على النكتة القديمة
ونسيت إنك بتحبّش
البوم "بعد الهزيمة"
ونسيت فساتيني
وما ضل إلا فستان
جابولي إياه مع أسمي
أبيض من الحيطان
فستان واحد بس
راح استأجره علأغلب
ياخي الحياة غليت
وأبوي عم بتعب
بتعرف شو فكرت لما قلت بدك نبقى مع بعض للأبد؟
فكرت أعطيك حياتي، بس كمان فكرت أسمّك
تخيّلت بنتي، إحزر شو؟ مكنتش تشبه إمّك
فكّرت شو ممكن يصير
لو أختفي بدل م أضمّك
