مجنون
جوايا واحد عاقل
جوايا واحد مجنون
جوايا واحد حر
وجوايا واحد مسجون
بالسلاسل ربطوه
مش عايزين يفكوه
خايفين منه يطلع
يجيب فيهم جون
فقرروا يقتلوه
سلاحى قلم رصاص
كلامى مدفع رشاش
خايفين منه يطلع
يستخدموه كل الناس
فخبوه ومنعوه
لكن برده كلامى عاش
دمى في كل كل كلامى
وكلامى مش ببلاش
الحرية تمنها حياتى
هتقولوا عليا شهيد
بعد ميت سنة ثورة
هيعملوا على إسمى عيد
أنا بلعب خط هجوم
مواجهة طول اليوم
فطبعا هيجيبوا دليل
علشان برفض التطبيل
الإتهامات في الدرج جاهزة
الفيل في المنديل
الحرب خلتوها مشتعلة
على الوسائل الإجتماعية
حلوة على الشاشة القاعدة
عمالين تتهموا فيا
ليه بتهتموا بيا
علشان كلمة حق
لازم أقول حاضر
وما أقولش مرة لأ
لأ مش قايل كلامكم
ولا هردد شعاراتكم
العالى خلقنى حر
إيمانى مش هيقل
حتى لو دقت المر
مش هرضى بأى ذل
بشهد قدام الكل
مش هرضى بأى ظلم
مش هرضى يبات الظالم
على إيديه دم المظلوم
هاجيلكم حتى في أحلامكم
مش هتشوفوا في يوم النوم
الثورة الجاية جاية
وهتبقى ديه نهايتكم
بنطالب بالحرية
هنطالب بدفع الدية
ناوى أخد بتارى
ضرب نار عيارى
صوت الحق عالى
ده حقى وحق عيالى
الشهدا تمنهم غالى
