خلتينى استنّى جنبك
خلتينى بديل لقلبه
خلتينى استنّى حبك
و انتى مستنيّه حُبّه
تبعدى كل امّا اقرب
تندهيلى كل ما انسى
كل ما اسأل عن قرارِك
بتقوليلى يا روحى لسّه
لسّه ايه؟
البُكا تبكيه فى حُضنُه
و اما حُضنُه يضيق تجيلى
بتروحيلُه لما ييجى
و اما بيغيب ترجعيلى
و الفَرَح يملا كيانك
ضحكتِك تشرق حياة
لو يقولك كلمه حلوة
و تلمحى لمعة عينيه
لسّه إيه؟
لسّه هنقابل بشر
يعشقوكى من عينيكى؟
لسه هنقابل بشر
يحسدونى ان انتى جنبى؟
و الحقيقه ان انتى جنبى و مش لاقيكى
أعشق أخاف
أبعد أخاف
تحتاجينى أبقى ضهرِك
و انتى شايفه الناس قصادك
و انا ضهرك فا مش متشاف
أبقى حضنِك فى الخطر
و أملَى كل الكون مطر
لو سنينك كات عجاف
تمسحينى و تكتبينى
بين دفاترك بالرصاص
و اكتبك بحروف تنور
كل عمرى بحبر جاف
كل دفتر من دفاترى
ما فيه غير اسمك عليه
لسّه إيه؟
ف إوعى تيجى تندهينى
يوم ما ابطّل توحشينى
يوم ما اقرر إنى هنسى
و ان سألتى عن رجوعى
الإجابه هتبقى "لسّه"
