مبعرفش اعوم رغم كونى من بلاد العابرين
مبعرفش اعاند دخول الموج لرئة الرمل
و بكتفى بالوقوف ع الشط باصص لبكرة من عيون الأمس
للشمس بخرج حد مش شبهى
بكتب تفاصيل اعتذار البحر للمركب
بسرد حكايا الغرقانين للغرقانين
و بودع المغرب
بسأل
ازاى غرق من سنة
و لسه طيارته الورق بتعاكس السياح
و بتنتصر ع الريح
بسأل عن الموج الأخير قبل القيامة
هل هاييجى زى عادته سريع
ولا هيطل بعلامة
وهل للغرقانين افكار بديلة قبل الغرق بثوانى
هل حسوا بصراخ الناظرين مثلاً
ولا حنوا للأغانى
للبحر
كل الفرص فى الاختيار
اول معرفتنا بالصدف و الصُدف بالفرقة و الفُرقة
وأول مشاهدة للبنات و هيا بتمتحن فى السر موت الزرقة بالزرقة
للبحر كانوا بينزلوا جماعات بيفتشوا عن مركب الفرعون و عن لون السمك قبل التعرض للهوا
انا اكتفيت بالشط
اكتفيت بالنظر للفاتنات و الفريسكا
وشوفت الموت بيختبر البيوت الرمل ع الواقفة
و بيقتل فى العيال حلم الغُنا و البُنا
يونس نبى
انا مجرد مُبتلى بالشعر
مقدرش اجازف بالدخول
مضمنش يبقى الحوت صديقى
يبتسم
فاخرج
كل الى هقدر أعمله آخد نفس
يشبه دخولى لحد المركب الغرقان
وافضل هنا وسطكم
بضحك كمان
و اضحك
واضحك كمان
سألت نفسى
ايه الى ممكن يمثله البحر ليا
لدنجوان مش وسيم زيى
لنص شاعر
وقف على حافة الشعر يتفرج على الشعرا
و إيدين غريبة زقته افتكروه معاهم
ايه الى ممكن اعمله لو
حبيبتى حدفت بإيديها كورة للموجه و بكل لطف و رقة طلبت منى اجيبها
حلّين قصادى
انط عكس الموج
و اجازف
و انتهى
بطل فى عينها
عبيط فى نظر البحر
و إما
اسيب الكورة مش حزنان عليها
ارجعلها بهدوء ابوس ايديها
و اعزمها فى مكان هادى
مفيهوش من البحر غير طبق الفيليه و الصدف
آسف صحابى
هاسيبكوا للوداع و البحر
وهاكون مع البنت الى حبيتها فى مكان هادى
او
هاكون اتنين زى الشيزوفرينيا الى مولودة فى قصايدى
واحد فى حضن البحر
و التانى ويا البنت فى الكازينو
حدثين
فى نفس الوقت هدخلهم
و مش هخرج
هنزل برجلى المية خايف من الى جاى
على فكرة فُستانك الليلة جميل جداً
همشى لحد الموج مايوصل ركبتى
الروج كمان لونه انهاردة بديع
الناس هتتفرج عليا و يضحكوا فى البحر
كنتى فين من زمان وحشتينى
هابعد عن الاصحاب و هتلاشى فاميشوفونيش
بحبك أول مرة اقولها صدقينى
الارض ضاعت تحت منى و ابتديت اغرق
هشوفك امتى تانى
ابتديت اغرق
أيوا معاد مُناسب
بغرق
وانتى من اهله
انا شخصين هكون بين الحياة و الموت
واحد فى حضن البحر رايح للتاريخ
هتكون قريب قصته زى السمك و الصدف و المركب الغرقان
والتانى ويا البنت فى الكازينو
بيرقص فلامينكو
مش خايف من الاحداث
بيضحك كمان
و يضحك
ويضحك كمان
