ياليت ان الزمن يرجع
ورى ولا الليالي تدور
ويرجع وقتنا الأول
وننعم في بساطتنا
زمان اول احس انه
زمان فيه صدق شعور
نحب ونخلص النيه
وتجمعنا محبتنا
زمن ما فيه لا غيبه
ولا حتى نفاق وزور
ياليته بس لو يرجع
ونسترجع طفولتنا
صغار قلوبنا بيضا
نعيش بعالم محصور
ولا نعرف ابد اغراب
ما غير عيال حارتنا
صحيح صغار فالتفكير
لكن ماعلينا قصور
نخطط نكسر اللعبه
وتسعدنا شقاوتنا
نروح المدرسه بدري
ونضحك داخل الطابور
نحاول نزعج العالم
في روحتنا وجيتنا
وعشان نأخر الحصه
نخبي علبة الطبشور
نشاغب بس فالاخر
تميزنا برائتنا
نحب الضحك والهيصه
نحب انط فوق السور
نفرفش ليه مانفرفش
مدام الضحك عادتنا
ولكن دارت الأيام
وبان الخافي المستور
وصار الهم متعلي
على قمة سعادتنا
كبرنا وصارت الدنيا
تصف أحزاننا بالدور
وتهدينا الألم والهم
غصب عن عين رغبتنا
تعبنا من بلاوينا
أحد ضايق وأحد مقهور
وكل غارق بهمه
وفالاخر تشتتنا
وانا ما أقول غير الا
ياليت الزمان يدور
ويرجع للورى فتره
نعدل وضع عيشتنا
