اهلا بكم كالعادة معاكم صليحز، اليوم موضوعنا الهانيبوت ولا كيما يترجم بالعربي صحن العسل

الهانيبوت يساهم بنسبة كبيرة جدا في تطوير الامن المعلوماتي فخلونا نكتشفو مع بعضنا شنوة الهانيبوت

لكن لازم بعرفو وقتاش اول ضهور للتكنولوجيا هاذي اللي غيرت مجرى الانترنت بالكامل، عام 1991 كان اول مرة تتطرح فيه الفكرة عن طريق clifford atoll و bill chewick

اتول وقتها كان عنده شركة و كان فم شكون بيراتاهم و حاب يهز معلوماتهم،

اما chewick كان هو اصحابه يتبعو في هاكر يحبو يحصلوه.

عام 1997 خرج اول محاولة صناعة هانيبوت و كان الاسم متاعه deceptive toolkit

Deceptive toolkit كان يخدم في حكاية متطورة عالاخر في الوقت اذاكا لي هي سيستام كامل اذا انت تحاول باش تخترقه يخليك على راحتك و يسهلك كل شيء من غير ما تشلق، لكن في نفس الوقت يجمع في معلومات منك باللي يقدر و يبدا يحاول يخترقك حتى هو.

و عام 1998 خرج اول هانيبوت تجاري باسم cybercop stig

الوقت يجري، الابحاث قاعدة تطور في التكنولوجيا هاذي، حتى لين جا عام 2002 ووقتها ولا الهانيبوت متاح للعالم اجمع للاستعمال و هذا بعد ما تاكدو اللي التكنولوجيا هاذي ابرزت نجاعتها و قوتها

و اخر تاريخ مهم بالنسبة لينا تو هو عام 2005 وقت اللي دولة الفيليبيين عملت الهانيبوت الخاص بيها باش يحمي حواسب و اجهزة المواطنين.

و تو بعد معرفنا تاريخ الهانيبوت و كيفاش تطور بالوقت من فكرة لاقوى ادوات الحماية، لازم نعرفو شيعمل الهانيبوت بالضبط، اول حاجة التنبيه، يعني اذا انت مركب هانيبوت و فم شكون قاعد يهجم عليكم، الهانيبوت هو لي يتلقى الهجمات و في نفس الوقت يعلمك لي انه فم خطر على السيستام متاعك.

ثاني حكاية جمع المعلومات، و هاذي من ابرز المهام خاطر يحاور يجمع اقصى حد مالمعلومات كيما شنية الثغرات اللي في النظام متاعك لي ادت لاختراقك، و اخر حاجة شنية الاساليب و الادوات التي بيها نجمو يهاجموك و كيما هكا يزيدو يحاول يطيحو المهاجم بسهولة.

اكيد تو راك فهمت شنوة هو الهانيبوت و شيعمل بالضبط، امالا خلينا نعرفو كيفاش يتركب و كيفاش يخدم.

الهانيبوت ماهوش برنامج عادي تعمله انستال و تتعدى، لا الهانيبوت عبارة على سيرفير و كيما ينجم يكون حقيقي كيما ينجم يكون وهمي، حقيقي يعني هو نظام اساسي يعني ماكينة مصبوب فيها هو ديراكت، و وهمي يعني فم سيرفار قاعد يخدم لكن هو يتصب وسطه و معنداش وجود فعلي، و الهانيبوت ديما تكون الحماية فيه شبه معدومة بلعاني باش اي هجوم عالشبكة يجي في الهانيبوت، ووقت الي المهاجم بي بالك نجح و دخل للسيستام باش يلقى روحه في متاهة جديدة يعني باش يبدى داخل الهانيبوت ماهوش داخل النظام متاعك، اضاكا علاش ديما تلقى الهانيبوت معبى برشا حكايات تخليك مركز معاه كيما بطاقات بنكية و حسابات مصريفية لكن مزيفة مش حقيقية و هني تذكرو اول مهمت الهانيبوت وهي التنبيه و كيما قلنا يتلقى الهجمة و يعلم اللي فم خطر على الموسسة،

حاجة الاخرى حاب نقولها انه الهانيبوت يتصب معاه firewall بمعنى جدار ناري و كيما هكا يستقبل معلومات من المهاجم لكن ميخرجش معلومات الشركة لبرا، بالأحرى يهز و ميعطيش،

و في الاجواء هذي كل يبقى يسجل كل حركة تصير باش يعرف كيما قلنا مبكري شنية الثغرات لي مكنت المهاجم مالدخول و شنية الادوات اللي يستعمل فيها المهاجم و بالوقت يعرفو شكون هو المهاجم عن طريق

جمع برشا برشا معلومات.

هذا هو الهانيبوت صحن العسل ، حبيت نشارك معاكم الموضوع، طبعا اختصرت برشا حاجات مذكرتها، لكن خلي هذا كبداية ليك و ابدا رحلتك في التعلم