طيبولي جروحي، رجعولي روحي، بلاش تروحي

ولما كله شاف طريقه، اتبقالي بوحي ولا كان على بالي فُراق ولا بُعد

اختارت أعيش وأحب ، كانت حبال ما بين رقبتي وكل ما تبعد كانت بتشد

وأنا اتعذبت، قلبي كان في بحر العشق هِلب

وإنتي كدب زي طير بيبني بيوت ويهِج

فـ خلاص سلام ، طالبتي بحرب وقولت سلام

وأنا قلبي إتخان، اتباع بكام؟ فاتتني ليالي نسيت أنام

وقوليلي الحلو عشان مش لاقي، اتضحى بإيه عشاني

وكنتش أملك غيرك، لأجل عيونك كنت أحارب

واحكيلي حالك، لو مكاني مش هتزيدي خطوة

واللي زاد الحُزن طقّة، مكنتش عاوزك تبقي فترة

لميت رحالي، وخدت حالي فتحت بابي وقومت ماشي

قفلت بابك وقولت خلاص وعملت نفسي ناسي

والليل كابوس بيخوف، بعد ما كان رفيق بيهون

رسمتلي حياة وياها، كانت حرباية وبتتلون

مكانتش الدنيا وردي وكان نصيبي أتساب لوحدي

مشيت حلو وخربت عندي، وليه بتعاندي

اديتهم كل طاقتي ولما استقووا، بعدوا عني

داويت الكل، ولما اتصابت سابوني وسيحت في دمي

كان شيء مش سهل، يعني يعز عليا أكتبك

حاولت كتير أكون لك، بس قلبي مش سكتك

وصعب أمسكك، شوفتيني شيطان واتخليتي

سحرك أذاني، علمتيني أتعلق وإختفيتي

وكنتي بيتي صَبَحت وحيد بلا مأوى

واللي ساندني وخد بإيدي، كان سيجارة وحبة قهوة

الدنيا علمتني كتير وإنتي أصعب درس خدته

وإن جيت للحق، البُعد سابلي جرح مكانش وقته

يا قلبي مين يداويك سامحني عشان برميك

محدش غيري كان آذيك عشان أهملت فيك

وفارقت خلق ياما، يمكن ذنب حد منهم

ودارت الأيام وسهرت كيف ما سهرت عينهم

عمري ضاع في ليالي سهرت فيها لأجلك

وباين اتهيأ لك هعيش سعيد من بعدك

لو عليا مكنتش أفارقك غمضة عين

بس الكِبر خلى البُعد في عيني زين

مكانتش الدنيا وردي وكان نصيبي أتساب لوحدي

مشيت حلو وخربت عندي، وليه بتعاندي

اديتهم كل طاقتي ولما استقووا، بعدوا عني

داويت الكل، ولما اتصابت سابوني وسيحت في دمي

وإزاي تغيبي بعد ما عودتيني أهربلك

كان غريب لما قلبي بكون في حضن ضلوعي بس أقربلك

قالتلي أنا بين إيديك والوعد دين مش سهل

الحُزن ضيّ العين، ونار الشوق تدفي في عز البرد

شوفتك ملاك، خليتك تحبي نفسك

واللي نابني، صداع فَرتك دماغي وضيق في نَفَسي

وأنا كنت أريدك كيف ما كنت أشوفك من عيوني

وشوفتي حُبي ليكي ضعف وأنا مش ضعيف من دونك

والعند مفادش، سبت ورود وسيبتي خَدش

قلبي مَخَدْش غير الجرح وأصبح هش

وعقلي وَشّ، بس مخابش، علمت نفسي مخافش

عشان مبانش قش، كان ودّي أبيع بس مهانش

ولو هموت، جدعنتي نعش

سبتيني بشغف، واستكترتي عليا طلّة منك

وأنا لو هطول السما نجمة نجمة كنت هجيبلك

لكنك..قلبك قاسي متعرفيش تحبي

لكن عرفتي تأذي حد إشتَرَاكي وكان بيحبك

مكانتش الدنيا وردي وكان نصيبي أتساب لوحدي

مشيت حلو وخربت عندي، وليه بتعاندي!

اديتهم كل طاقتي ولما استقووا، بعدوا عني

داويت الكل، ولما اتصابت سابوني وسيحت في دمي