محبوس في دايرة من الأوهام واليأس

بحاول أتحرر كل يوم مش عارف لا بأس

يمكن لما الناس تتعرف على أحزاني

تفهم تقدر تصرفاتي أفعالي وجناني

لا بقى كفاية، كفاية، كفاية تبرير

كفاية، كفاية محاولات بائسة للتغيير

خلاص مش هسكت هتكلم بدعوكم للسماع

هختم كلامي في النهاية بكلمة الوداع

قررت أسيب حياتكم وأسيب لكم المسرحية

إفرحوا بالأضواء والتمثيل والنجومية

وهمية الدنيا اللي كلنا عايشين فيها

عارفين والغريب باسنانكم متبتين فيها

أنا عارف إن أنا مش أول واحد يتعرض لضغوط

ولا هبقى آخر واحد ياخذ حياته بإيده يموت

مش كفاية طول اليوم نظراتكم ليّ

بتجوني في فكري قبل النوم وفي أحلامي اليومية

أسألتكم بتنهش عقلي زي الضباع بتحوم

وازاي ألوم في ضبع كنت بأمره بالصوم

فلو سألتوا هرد بأي كلام وأضحك عليكم

بزعل لما تصدقوا الكذبة وتكذبوا عينيكم

يمكن بتصدقوني علشان ده أسهل على ضميركم

بتسألوني مالك إنتم كثير وغيركم

بس عمر ما حد فيكم اهتم يسمع الإجابة

ولو فتحت قلبي ليكم هتقولوا لي بلاش كآبة

فسيبوني أروح لعالم ثاني أجمل من عالمكم

أكون في وسط عالم أعلم بحالي منكم

الوداع للقوم الكاذبين المدعين

لا تصطنعوا اهتمامكم كلكم مكشوفين

مش وحيد بس وحدي

وسط ألمي ومحنتي

نفسي ليكم أقول وأحكي

تبقوا سندي وقوتي

مش وحيد بس وحدي

وسط ألمي ومحنتي

نفسي ليكم أقول وأحكي

تبقوا سندي وقوتي

الوداع للقوم الكاذبين المدعين

لا تصطنعوا اهتمامكم كلكم مكشوفين

الكلام لمين لكل المستمعين

وعلى لسان مين مراهقين بكرة يبقوا كبار

قلوب صغيرة بتعاني سرعة الإحتضار

ضغوط الأهل والمجتمع أثرت عليهم

زرعت فيهم مشاكل أبدا ما كانت فيهم

من تهميش صوتهم ودورهم في مستقبلهم من أهلهم

معاناتهم لو اختلفوا عن مجتمعهم في فكرهم

ازاي بتلوم في طفل إنت السبب في تكوينه

بتستنكر وجوده بتذل فيه وتهينه

أفعالك في الأساس هي أصلا سبب المرض

لو مش عاجبك تربيته المفروض إنت اللي تتحرج

هرج ومرج جوه عقل الشاب اللي اتدرج

تحت تصنيف مكتئب عايش بيحلم بالفرج

الإكتئاب ده مرض مش حالة ولا مود

واصل لربع شبابنا بالأرقام والشهود

خمسة وعشرين في المية من الشباب مكتئبين

بيعانوا أمراض نفسية وعن الحياة معزولين

ستة في المية منهم بيفكروا في الإنتحار

وارجع لكتاب اكتئاب المراهقين والأطفال

فمتربوش ولادكم ع الأوامر والتهزيق

ما تكسروش مقاديفهم بالكبت والتضييق

العنف مش بس عنف مد اللسان والإيد

العنف كسر النفس وتحويلهم عبيد

فلو إنت نفسك لسه مش متصالح مع نفسك

ماتجبش في الدنيا طفل في أمراضك ينافسك

واعرف وافهم إن البنين زينه فتنة زي المال

فاللي معهوش فلوس بقي بيكنز في العيال

اللي غرقوا في مشاكل منشأها البيوت

أنا مش جاحد لفضل أهلي ولا بدعوكم اللعقوق

أنا بوصل حقيقة مجتمعنا

مجتمع أملي وأملهم إنه يسمعنا

مش وحيد بس وحدي

وسط ألمي ومحنتي

نفسي ليكم أقول وأحكي

تبقوا سندي وقوتي

مش وحيد بس وحدي

وسط ألمي ومحنتي

نفسي ليكم أقول وأحكي

تبقوا سندي وقوتي