العقارب بتلف
و عيني على الشباك ثابتة
مش بترف
مستنية أي جديد
الإشارة بتنور
أخضر
اصفر
احمر
بنفس الترتيب
و بتفضل تعيد
مافيش أحداث
مافيش حد يجي يكسر الباب بالترباس
و يطلعني برى
حبست نفسي
جوة فكرة ضلمة
ان مافيش مغزى
أنا آسفة
هي الكلمة المناسبة
آسفة أني موجودة
آسفة أني مش موجودة
آسفة أني جسم
شايل روح مهدودة
آسفة للأحداث
الي بحرقلها جديدها
آسفة أني بتوقعها
ف بمحي زهوتها
آسفة للخريف
أنت ماقصرتش
أكيد لسىاك جميل
بس أنا الي ماستطعمتش
بطلت أعرف أذوق
آسفة للشروق
أني بفوته
مع أني بصحاله مخصوص
بس مش حاسة بدخلته
كل حاجة لسه عتمة
بياع الفل على الإشارة
لسه بيدعي
يا رب تتجوزها
يمكن ده الفرق الوحيد
أني أنا و هو
دي آخر مرة هنشوفها
و بكرة يعدي و معاه واحدة غيرها
و بياع الفل يفضل يدعي
و الإشارة تفضل أنوارها تجري
و هو ثابت
زي عيني الي مش بترف
و يدعي الشريط يرجع يسف
يبدأ من الأول
يجي عند لحظات ظهورها
يمشي بالبطئ، يطول
بس للأسف
ده مش هيحصل
و في لحظتها هيتحول
لنسخة مني
و هيعد في مكانه مستني
حد يجي يكسر الباب
يخده برى
لفكرة حرة
ف يرحم نفسه من الجلد
و كتر العقاب
بس برضه مش هيحصل
لأنها مش واقفة هناك
زي ما أنت مش واقف
فا يصبح آسف
زي منا آسفة
آسف للظروف
آسف للظروف
الي ماعرفتش تشيل
رسايلي من تقل الحروف
و ترجع تطوف
أنت لوحدك في عقلي
زي اليكترون مصفوف
في مدار وحيد حولين رقبتي
فافضل اسأل
يا ترى لو كنت فضلت أكتر
كانت الإشارة ممكن تنور أخضر
و تثبت؟
