تخاطر
بحاول اسيبلك رسايل في كل حتة
بلون هدومي
الي مايل للغوامق
الي انت بتحبها
بأغاني بعملها شير و هي اصلا مش شبهي
عندك في البلاي ليست favorites بس
بصور بنزلها في نفس الأماكن الي كنّا بنروحها
مع انها مابقتش نفسها، لما بعدنا
بتسريحة شعري الي ديما بقت على ورى
عشان وشي يبان اكتر
فاكر لما كنت بتقولي ان شكلي كده بيبقى احلى
هو انت فاكرني اصلا
عارف فكرة انك تنساني
توجعني اكتر بكتير
من انك تكون مع حد تاني
اصل لو نستني
كأني ماكنتش
و كل الي بِنَا هيبقى نصاص
النص الي شيلاه جوايا انا بس
كل مرة ضحكنا فيها من قلبنا
مش هيبقى منها غير شكل عينك انت و هي بتكرمش
و مجرد وجهة نظري في ضحكتي
اصل شكل ضحكتي فعلا
المفروض متشال في عينك انت
ف لو نستني
انا هختفي من كل المشاهد
و انا مش هستحمل ان ميبقاش في فترة من الزمن
بتجمعني بيك
بحاول اسيبلك رسايل في كل مكان
عشان مش ضامنة تكون غيرت محل لإقامة
و قصدي بمحل الإقامة
هو النقطة الي واقف فيها فكرك في الوقت الحالي
ف بحاول اسيبلك اكبر قدر
عشان لو مخك ماترجمش رسالة
التانية تكون شبه الكلام الي بيستوعبه في الفترة دي
بسيبلك رسايل بكل مرة بصور فيها الغروب
و اي حاجة لونها لبني
بكل مرة بنزل فيها من غير مكياج
على أمل اني اخبط بيك صدفة
صوتك لسى في وداني و انت بتقولي
بحب عيونك و هي عريانة
بحاول ابعت رسايل لكل حواسك
بروح معارض كتير و أتصور فيها
اصلي عارفة انك بتذوق بروحك
بنزل حتت من أفلام
بتوصف حبة من الي حاسة بيه
على أمل انك تعرف تلمس
اد ايه وحشني
بحط صور كنت انت الي مصورهاني
في يوم عدينا فيه حاجز زيادة لبعض
في لحظة كنا اقرب فيها من اي يوم قبله
على أمل انك تشم برفاني غصب عنك
بضحك في ڤيديوهات و اكتم الصوت
عشان اجبر مخك يطلع صوت ضحكة ليا من ذكرى قديمة ، فأرجع اتنفس جواك.
بكتب كلام مالوش علاقة بيا، يمكن تقدر تشوف
قد ايه الحزن بيغير
بحاول اسيبلك رسايل
تقرب المسافة
في المسافة القديمة
كنت بلاقي نفسي
بقدر أكون انا
و احبك في نفس الوقت
بقدر احبك من غير ما اخلص
بس دلوقتي عشان صوتي يوصلك من الماضي
بنده بأعلى صوت ليا
فطاقتي قربت تفضى
و انا معاها
عارفة ان انا الي بعدت
بس ماكنش قلة حب فيك
كان قلة ثقة فيا
كنت خايفة ماقدرش اشدك ليا لوقتي طويل
فأنت الي تبعد
و انا اعيش أعراض الانسحاب لوحدي
كنت بخاف أعيش مشاعر حقيقية
اشتغلت كتير على عقلي فا كبر
بس كنت دايما عندي خجل من اني احس
فا قلبي فضل اصغر من انه يحتمل
كم مشاعر كبيرة
او حتى لو صغيرة بس معقدة
اصلا المشاعر المعقدة بتكون اكبر في حجمها
مهما بانت صغيرة
كل ما بتبتدي تحل جزء من العقدة
تلاقي حجمها بان
و بانت كانت شايلة جواها قد ايه
زي مجموعة سلاسل ماسكة في بعض
يمكن عشان كده أنا الي اخترت البعد
عشان قلبي كان اصغر من انه يحس لشخص واحد
كل ده
مش عارفة دي الرسالة الكام
يمكن رسائلي متأخرة
يمكن جاية بدري
مش عارفة توقيت خروجها من عندي
بس عارفة انها هتخبطك
في وقتها
لان ساعة القدر مظبوطة
مش مأجلة دقيقة
ولا مقدمة
