بعدين معاكِ يا أغلى أم
دبحتيني في كل وسيلة
كل يومين هم وغم
وأنا فيكِ بموت ما بيدي حيلة
هو إنتِ يا إما تحرقيني
وتنوري حياتي بنار
يا إما بعزمك تحدفيني
من عبارة أو باب قطار
يا بلدي ليكِ ناس وناس
ناس استايل عايشين في قصر
وناس تانية ليهم مداس
بيترموا من جوه قطر
حتى يا بلدي التذكرة
ليها ضحايا ويوم شهيد
خلوكي يا بلدي معصرة
تعصر شباب وأرواح تبيد
طاوعك قلبك تحدفه
عشان ماعهوش حبة ورق
تحرق قلب اللي يعرفه
عشان فقير فيتحرق
ما هو لو ابن باشا ولا بيه
كنت عملت تعظيم سلام
لكن الفقير تيجي عليه
وليه قانون للإنتقام
أصل الرجولة مش شنب
ووقت الخطر تعمل كفيف
حتى لو بت هتغُتصب
أو من قطر بيرموا ضعيف
