كنتي حلم جميل
معرفش ان كان حقيقي او لأ
كنتي خيال كلام اغاني
طير نهار ونجم ليل
شافه الصَبي وصدق
رواية قديمة ورقها مَهري جاية من زمن تاني
كلام الأدب المنثور في زمان غير زماني
ليه لما بشوفك دلوقتي بستغرب
وكإنه ده حد تاني
ياأغبي انشف دماغ انا شوفتها وعرفتها
نسيت كل عمايلها وصدقتها
ولما بروح لأيامنا بشوفك
وكإنك الماضي البعيد
والراحلين لكون جديد
كإنك طفلي اللي كان في يوم العيد
مصيف سعيد
معادش ليه وجود ولا مكان
ولا ناس ولا أرض ولا سُكان
عالم موازي مفتاحه ذكري وخيال
فيه سما صافية وطيارة ورق ولعب عيال
بستغرب ازاي دي كنتي انتي
وازاي شافوكي عينيا وعنيكي ازاي شافتني
مين اللي عشت معاها في هَلْوَسَة
سنين من الهَزَيان
بره العالم بره الزمان
والمكان
كانت حقيقة .. كانت صديقة ولا عَدو
ولا دكتور مريض في مصحة نفسية
كذب بإنه العلاج وكان المرض فيها هي
مَس الولد البرئ في رحلة نقاهة
كان يظنها رحلة
وأمله في طريق يروحه معاها
مكانش شايف انها سحلة
مستسهل بالطو الدكاترة الطيبين
يدي الأمل للعيانين
تمشي الحالات وتسيبله من عندها واحدة
كنتي حقيقة ولا بواقي شعاع الشمس
في ارض بيضا كبيرة واسعة
مَخرَج خيال صدقته ينسي الأمس
مَخرَج حياة لأراضي خَضرة وشاسعة
مخرج خيال خدعني وعمره ماحس
اللوحة باهتة بس تبان ناصعة
ويفضل سؤال
ليه الخيال الحلو
نساني كل الخيال
وكسرني في أمل الورد
حول ألوانه للرمادي بجد
خلي عقلي غير قادر علي التجديد
وعينيا مش شايفة خيالها بالتحديد
كنتي فعلا حقيقة
ولا كنتي مُجَرد حَد
صادفته عالقهوة ورسمته
بخيالي انا
مش بلونه الحقيقي
؛ لكن بلون الورد
#ريمون_روماني
