يا الخفوق اللي أحبه حيل وأطمع في رضاته

رغم كل اللي حصل ما قلت يغريني بديلك

إن رسمتك عين قال الحب الله يا حلاته

وإن كتبتك شوق كل حرف من أعماقي يشيلك

قلت بنسى وعلميني بس ليلي كيف أباته

وقلت أسلا وقلت ما أقدر آه يا صبرك وحيلك

وابتدا ليل الفراق اللي خذا منك وصاته

وانجبر قلبي قبل لا أقول أرجاك ودخيلك

إنتهينا وكل واحد له طريق في حياته

إنطوت صفحة غرامي لك وبادرت برحيلك

خذ معك أبسط تفاصيلك وكل ما جاك هاته

جب مكاتيبي وإنت أغلى مكاتيبك تجي لك

ما بقى باقي بقصة عشق أعلنا وفاته

من صباح الأمنيات إلين زلاتك وليلك

إبتديت الشوق بعيونك ورمشك وإلتفاته

غلطة الشاطر بألف وغلطتي ضعت بسبيلك

يا الخفوق اللي أحبه حيل وأطمع في رضاته

رغم كل اللي حصل ما قلت يغريني بديلك

إن رسمتك عين قال الحب الله يا حلاته

وإن كتبتك شوق كل حرف من أعماقي يشيلك

ما حفظت أيام عشرتنا عن لسان الشماته

ولا أنا حافظك حفظ دموع عيني لا تسيلك

وش تبي أكثر من إن العمر في وده وهاته

سقت لك عمرٍ قلوب الغير تحسدك بحصيلك

غير قلبك ما تجرأ قلب سوا بي سواته

يا أول طعون الغرام أموت ما أجي لك دخيلك

حدني يمك غلا ما أدري وله ما أدري شراته

خافقٍ طامع بكسبك لين ما عوّد قتيلك

إتركي باقي جروحٍ هزها الوقت بجراته

ما عرف ها الحب قدري يوم قرر ينتحي لك

قلبي اللي حبك وصانك إلى حد إستماته

يرتوي طعم الهماج ولا يقرب سلسبيلك

هذا هو شعري زكاةٍ لك وأفكاري بناته

من كتبته فيك صارت أجمل أبياته تشيلك

باقي لك وسط خافق كان حبك به حياته

السلام وحشمة العشرة وشعرٍ ينتمي لك

وإلا أنا مقفي وعيبٍ ع الذي يقفي إلتفاته

لو تصوت ما سمعت ولو سمعتك ما أجي لك