مبتغنيش !!

مبتصليش !!

وكل ما بسألك مالك ؟

تقولي مفيش

غريب حالك

خلاص مبقتش طايق حد ؟!

و عودك اللي كان طارح

صبح دبلان ..

وفجأة إسْوَدّ

وحُبك للشوارع قَلّ

وتحديف الشجر بالطوب

بتزهق كل يوم وتمِلّ

وترجع بعد فترة تتوب

تروح للبحر ويصدك

وتتقل خطوتك للبيت

وهو البحر لو هيحب

ما كان حَبك زمان يا عبيط

تأجل كُل مواعيدك

بحِجة جسمك التعبان

خلاص سلمت يا طيب

رضيت بالقعدة والطوابير

ونهر النيل قصاد عينك

(ولم يتعب من المشاوير )

وعُمرك لسه مش عُمرُه

وحالُه زفت عن حالك

وإيه يعني الظروف ضدك

ما تسترجل يا واد مالك

#أحمد_سعد