كتاب حياتي يا عين ماشفت زيه كتاب

الفرح فيه سطرين والباقي كله عذاب

كتاب حزين كله مآسي، تأليف زمان غدار قاسي

الفرح سطر غلط مكتوب، لما الزمن كان يوم ناسي

مكتوب فأول صفحاته، واحد غريب وآدي حياته

حيعيش حزين ويسيبها حزين، إمضاء زمن وتحياته

كتب الزمان جواه همي، من غير مايرحم ويسمي

كتب عليا البكا والنوح، وهان عليه دمعي ودمي

الصحة دابت صفحتها، من الدموع لما قرتها

إستكترتها الدنيا زمان، ومن زمان مني خدتها

كشف الحكيم أصبح عادة، ومن عيادة لعيادة

وكل واحد أرحله يقول، قطعت قلبي بزيادة

بدل الحكيم رحت ل مية، وخذت كل الأدويه

والكل قالوا عن جرحي، ماخذناهوش في الكليه

دلوقتي عندي ماتفرقشي، أطيب وأروق ولا ماروقشي

العمر عدى وحملي ثقيل، لو كان جبل كان ما يطقشي

ييجي الطبيب عندي أحكيله، يقول سلامتك أدعيله

ولمل أقوله إزاي الحال، يخبي دمعه بمنديله

يادنيا هاتي كمان هاتي، ما يهمكيش هم حياتي

ما أنا أصلي واخد ع الأحزان، والدمع فعيوني ليلاتي

عذاب وهم وتوته توته، وآدي نهاية الحدوته

بدموع عنيا وأحزاني الدنيا راضيه ومبسوطة