يا غَيمْ اللّي مارق

وَقِّف فوقي شوَي

حَمَّلتَك أمانة

خِدها لتاني حَيّ

إِن شِفِت حدا

ما بيشبه حدا

غَطّي عنّو الشّمس

لَيِغفى بالفَيّ

يا غَيم اللّي مارق

اسمعني كلمة و روح

خبِّر هللّي ناسي

عَن صوتي المجروح

عن مكسور الخاطر

يللّي بعدو ناطر

تِبعَت نسمة منّو

لَترِدِّلّي الروح

يا غَيم اللّي مارق

شتّي عالأحلام

و ردّ اللّون الضّايع

من غَبرة الإيّام

وغَرِّق القَدَر

اللّي فينا غَدَر

و وَعّي سكوت الخوف

وسَكِّت الكَلام