و دي دنية إيه؟
لو فيها العدل مغمّي عنيه !!!
و الحق اتعكّز على رجليه !!
و فيها اللي في حاله يجيب من الإيه !!
و يتاك عليه !!
و دي دنية إيه؟
طول ما بتيجي دايمًا ع الغلبان !!
و اللي اتهان فيها يتساب يتهان
ميصحش نسأل هو فولان اتغير ليه !!
طول ما العتمة مغلوشة ع النور
وفي ناس بتعيش و تموت بالدور
جايز فينا يطلع ديب مسعور ع الناس حواليه
لولا الخايفين الخوف أصلًا كان ييجى منين !!!
لولا الجبناء فرعون كان يطلعلنا من فين !!!
طول ماهى سايبة و مفتوحة ع البحري شمال و يمين
طبعًا يتفرعن سين من الناس أو صاد أو عين
في مننا و حوالينا ناس قلوبها عامية
و عما القلوب أشد من عما النظر
بقى نصنا بينه وما بين العتمة كيميا
و نصنا بيحلم بمهدي منتظر
