بسرح في ليالي
وبتيجي على بالي
فبشتاق لك
دوامة في راسي
سابقها احساسي
فادمع واقول محتاجلك
بسأل يوماتي عنك
واقلب في رسايلك
كأن قلبي شايلك
متشالة في ركن
متشالة في حضن
متفصل على قدك
وحشتني مشاكلك وحواراتك
وخناقاتك معايا بالساعات
مين فلانة وتعرفها ليه؟!
أنت بتكلم بنات؟!
وحشتني ضحكة صافية
كانت بتخرج منك ليا
وحشتني جداً معاكستك
وانتي بتقولي مرايتك عينيا
من يوم ما مشيتي
وانا مخاصم المرايات
بخاف ابص في اي واحدة
الاقيني شبح لحد مات
وبخاف اسرح بزيادة
فاتوجع بالذكريات!
بعد الفراق فيه حد عايش
بعد الفراق فيه حد مات!!
انتي عيشتي وكنتي عيشتي
كنت ماسك حتى لما سبتي
كنت ماسك فيكي بكل قوة
كنت عشمان لحظة تحني!
وحشتيني بعدد دقايق الليل
وهي بتعدي سكاكين
وحشتيني بعدد المواويل
اللي قالوها العاشقين
وحشتيني وانتي مش ليا
لكن معايا في كل ثانية
وحشتيني يا جنة
صالحتني بيها يوم الدنيا
