أنا اللي لا سرجت الفكر وحصان القصيد ابداع

تخيّلت الورق صحرا وفكري جامح ابداعي

لأن الشِّعر له منهج وله مسلك وفنْ إقناع

اذا ما أبهِر السّامع، بيوتي ما لها داعي

وأنا اللي لا كِتبت اكتب ذهب أصلي ولا بلمّاع

وعن سوق الذهب يُكرم ولا يُشرى ولا يْباعي

وإذا قالوا بيوتي كِلّها تشبه شِعر فزّاع

اقول الشِّعر في قمّة جماله صار فزّاعي

وأنا اللي لا عشقت أعشق سِما يوم العشِق في القاع

وعن بحر العشق والشّوق مُبطي طاوي شراعي

لأني فيك يا فيني شِبهنا مِن شِبهنا ظاع

انا انت و انت انا وعاذل عشقنا ظاعي

أحبِّك ما ورا التفكير والتعبير والإقناع

لأنِّك عمري الباقي وحبِّك آخر اطماعي

على صوتك، على همسِك، لقيت العِمر ياللي ضاع

وعلى صوتك غِفت عيني وصوتك آخر اسماعي

تعال اعيّشك الدنيا واشمِّك وردي الفوّاع

تعال اغمِّض عيوني وقلبي م الوله واعي

تعال بروض من حبك وأسوار الغرام أظلاع

تعال وعيش في قلبٍ و امطِر م الوله قاعي

أنا بمركب محبّه معك ورياح الغرام شراع

و اوادِع كل هالدِّنيا و اترِك سلّة أوجاعي

لأنّي معك يا عمري احس إنْ العمر ما ظاع

وإذا بعكِس أنا الجُمله حياتي والعمر ظاعي