مش قادر أتحرك تاني
هافضل قاعد في مكاني
مش عارف أحرك لساني واللي فاكرني مسيره ينساني
تاني مش قادر أتحرك
ورايا حاجات كتير
مش قادر أقوم م السرير
كل حياتي بين الحيطان
شايف حياتهم من ورا القضبان
دا سبت غسيل دا مش باسكت زبالة
أنا الغلطان
أنا الغلطان مفيش حاجة هتتغير
مش ممكن أتغير هافضل محبوس
راسي في السما ورجليا في الميا
حلم دا ولا كابوس
الوقت عدى وخبراتي زادت
قلت بحبك وكنت صادق
كرامتي تغلب كل المبادئ
لو عايزة نرجع كله بمزاجك
البلد دي أبرد من اللي قبلها
حد يروح يقول لها
جسمي تعبان من وقتها
امتى ربنا يحلها
البلد دي أبرد من اللي قبلها
الحمد لله مستورة
مش محتاج حاجة من حد
فاضي بابحلق في الصورة
بابقى فاضي يوم الحد
الخلفية لسه تمام بس التفاصيل مكسورة
التفاصيل محفورة
في كل حتة، في كل وقت
مبكلمش بني آدمين
ما باتثبتش، مش جامدين
النفس بيخرج زي التنين
مش بختار باخد الاتنين
البطارية خلصت ليه
البطانية اتبلت ليه
قفل الشيش وشد الستارة
هد العمارة انا هاقعد في الصالة
البلد دي أبرد من اللي قبلها
حد يروح يقول لها
جسمي تعبان من وقتها
امتى ربنا يحلها
البلد دي أبرد من اللي قبلها
البلد دي أبرد من اللي قبلها
الضلمة فبركة والصمت دربكة
نفس بيعلي أصوات الهرتلة
لو رجعت تاني مساء الفرتكة
قلبي بريء لكن عقلي اللي ارتكب
العقل اللي ارتجل والقلب اللي اتسحل
دا الصبر عايز مرجلة
الصبر مرجحة
جسمي مطبوع ع المرتبة
الأوضة مكمكمة والدنيا معتمة
لازم أفتح الشباك دا أكتر من كدا
احنا ملناش دعوة بالشمس اللي برا
احنا هنا في الشتا، هنا لوحدنا
ظبط السيتاب، فتفت الحتت
روق وفرفش واتصاحب ع العتت
اتمرمغ في الطينة، أظن حتتك
شغل خيالك، أظن لعبتك
قلت اللي عندي وقلت كلمتك
كل الحاجات دي، قارشة ملحتك
الكون بأسره مش سايع فرحتك
البلد دي أبرد من اللي قبلها
حد يروح يقول لها
جسمي تعبان من وقتها
امتى ربنا يحلها
البلد دي أبرد من اللي قبلها
