ما بين اقول واخبي

شعوري وما اقول أهواك

تطيح الكلمة من قلبي

وحنيني يبان في عيوني

أبي تسمع حكي عيني

لأني كل ما ألقاك

كلامي يتوه رغم إني

حفظته بيني وبيني

عسى اللي قد ملا عيني

حنين بعشقتي يبلاك

ويعتقني من الحيرة

وبحبك يجازيني

رهنت ايامي لك وحدك

وانا يا دينيتي لولاك

ما يفتح لي الهنا بابه

ولا الضحكة تناديني

انا مو بس حبيتك

انا حبيتني وياك

واحب اللي تحبه زود

ولو ما كان يعنيني

أشوف الناس والدنيا

ولكن ما أشوف إلّاك

انا وش لي بهالعالم

دامك عالمي وكوني

طلبتِك كان لي خاطر

طلبتِك قول تم وجاك

سنيني معتمة دونك

أبيك تنوّر سنيني

ولأني ما اقدر احكيلك

وأتوه وارتبك وياك

أبيك تحس بإحساسي

وتقراني من عيوني