ما على قلبي مشاريه ومزاري
ساتراً حبّه ونبضاته عرايا
وش عليه إن جابلك سيرة وطاري
وأنت مرتاعك تحت حدب الحنايا
مشبعه حب ومتاهات ومساري
لين عاش معاتبك .. وصل وهدايا
ياوميض البرق فعيون الصحاري
الرجا سوّا بعشّاقك سوايا
للظلام وليلتينك جيت ساري
مرتوي هقوة وهقواتي ضمايا
دامك الطرقة وأنا جازم وضاري
ماعلى قلبك صدوف ولا رزايا
هو متى بعتك عشان اجيك شاري
وأنت مالك لاشبيه ولا حلايا
مترف ٍ ممشوق متقرد و داري
مابقا للزين في قدّك بقايا
كل ماتهتز في طولك مواري
رمح.. وعلومك تهاليل وسرايا
عاد .. لا بشّ الحيا والعود ذاري
وانهمر رمشك على سود المنايا
لاتحرّين انهزامي وانكساري
الهوى ماله حدود ولا زوايا
