يا شبل جر اللحن والراس طايل الحماس اترند والهقوة بعيدة

احتزم يا صوت حرب اهل الفعايل زلزل الساحة بالالحان الجديدة

المواقف ثابتة والشك زايل لا يمين ولا يسار الدرب سيده

ازبن اللي ما يمد الا الجزايل و ان لفاه الضيف كنه يوم عيده

خل عنك اللي لا شاف الدم سايل تضربه نفاضة الحمى الشديدة

ما نقول الا كلام له دلايل لا نقصر في الصحيح و لا نزيده

دامت الجم ما تغطيها النثايل ما تغط اهل المواقيف المجيدة

في مديح اللي تزين ابه المثايل يرسي المعنى على بحر القصيدة

ما مدحت الا كفو يابس بلايل من كفو وونعم مليان رصيده

افخر بشيخ من رجال الاوايل من وفاه ومن سجاياه الحميدة

يا شجاع الصيت مع كل القبايل وانت ابن متعب وليده من وليده

مثل ما تفخر بني تغلب ب وايل تفتخر بك حرب لسنين مديدة

اصوك مرسي سواة جبال حايل للكرم والطيب والارياء السديدة

لا حصلك فرصة لفعل الجمايل من كرمك اتعدها فرصة سعيدة

لين صارت لاجلك اتشد الرحايل مايجنب عنك شكايه الضديدة

جود كفك مثل همال المخايل مانت ضاري بالضعيفة والزهيده

فعلك مثبت ولا هو قول قايل من تعزوابك تقول انك عضيدة

لو كتبنا اسمك لحاله في الرسايل اسمك لحاله ترى جملة مفيدة

لا عتزيت بحرب يا نعم السلايل لو دحمت الضلع بجنوبك تبيده

حرب حرب وحرب متعبة الاصايل كانها حكة حديدة في حديدة

حرب حرب اللي يسوون الهوايل بالفعول اتطوع الروس العنيدة

حرب حرب وحرب تلطم كل عايل في النهار اللي عسى الله لا يعيده

حرب لا جات الفعايل والصمايل في الموقف كنها النار الوقيدة

يوم قدح النار في روس الفتايل من تعرضهم ما يبقى له شريدة

ما يعرفون المخادع والمحايل عندهم وضح النقا سلم وعقيدة

يطنخ الحربي على شتى الوسايل لا بغى له شي جاب اللي يريده

من طناخة راسه يدوس الملايل والحميا تدهر داخل وريده

دام عز اهل الوفاء واهل الجمايل ودام عزك يا حكومتنا الرشيدة