Verse 1: Big B
تعبت من الحكي و عشان هيك لساني انبرى
فساد بـ هالدولة و عشان هيك صرنا ورا
و شايف هالنظام من أساسه انو اهترى
و خصوصي هالدستور يلّي أصلاً ما بينقرا
فريقين بنزاع و بقولوا الأوّل انو افترى
و أقلّ مسؤول هون من دولة برّا عم ينشرى
ضهرة من القصر بلا حرس ما بيضهرا
و المواطن اذا محطّة لغير زعيمه ما بيحضرا
معلقين بالزعيم متل كيس مصل مع مريض
و بيحقن طائفيّاً بإبر مشكوكة بالوريد
و المسؤول كتير مشغول، مفكر حاله رسول
منوّمكن مغناطسيّاً و بعده ساري هالمفعول
مستعد تدافع عنّه و تصير كرماله مقتول
و ينزل خبر عالجرايد انو مات واحد مجهول
معقول !! تذكّر انت منّك مجبور
تضحّي كرمال مستعد يتاجر بالقبور
بضلّ عالكرسي مقبور حتى شغله ما بيشتغل
و السرقة من المواطن فيروس بيناتن عم ينتقل
شاطر لما يحكي دغري تقوّس و تحتفل!
عدّ كم مواطن بـ هالأثناء عم ينقتل
صدقني منك وحش انت هيك عم تنهبل
عدّ عم ساعة حتى تعيش عم تشتغل
لأدنى مقوّمات الحياة انت عم تفتقر
و حـ تتحسّن الأوضاع؟ ايه غلط عم تفتكر
الزعيم بكبّ وعود و بكذّب بلا حدود
و مجموعات بسمّوا حالن و عم يبذلوا هالمجهود
ناس بتسمّي فهود، ناس بتسمّي أسود
ناس بتسمّي نسور، ناس بتسمّي جنود
بس الواقع هو صعب، و الحقيقة انتوا غنم
الزعيم لمّا بدّه عم يلعب فيكن صنم
ما تفكروا نفوذه انو إجا هيك من عدم
كلّه من ضياعكن انتوا، كلّ فرصة الو اغتنم
و المواطن الموجود هو أكيد إلّي بينلام
قاعد بعالم تاني و بعده عايش بالأوهام
الزعيم ضاحك عليه و بعده ببيعه بالكلام
عيّشه بكذبة كبيرة، متل هنود بالأفلام
بس هالأفلام صارت بآخرها و قرّبت انو تخلص
رح تبيّن الحقيقة و جماهيرن حـ تضلّ عم تنقص
و لأنو مع الوقت عقل الشعب كمان عم ينضج
و لما يطيروا من المناصب، مشاكلنا أكيد حـ تفرج
Verse 2: Mar1
كأنو هالخطاب عم يتكرر إلو زمان
كأنو هالنظام عم يتضحك على القسم
كأنو الإعتصام عم بتطالو نار الفتن
والكذبة لي منتعلما بتبقى كلنا للوطن،
كلمات رنانة حتى اللبناني يحس حالو انتصر
إبر مورفين حتى اللبناني يحس حالو من البشر
والمعتصمين تهيئلن إنو الخصم قوى الأمن
عسكر على مين؟ هيك كان الرد حتى الشارع انقسم
نفس الموضوع بحلة جديدة بس غير لسانات
إبنو مسافر يدرس برا بس في غيرو إبنو مات
والشعب صاير متلكن بيحكو نفس الكلمات
غير صيغة لذات الهموم وذات الانتقادات
حشد جيوش تنخوض حروب بين أعز الأعداء
ولاد تحكم بأمور شعوب بس مش عارف رايحة وين
بيوتكن عم تتعمر عإيدن لي ما عندو إيدين
ولادكن عم تتعلم من أموال لي ما عندو أموال
خطابك هيت تنشوف، كهرباء؟ مرحبا
الزبالة برأيي كان مفروض يكون محلها بمكتبك
الشهادة ببيتي تفضل شوف عليها سمك الغبرة فـ
ببلادي بيكفي تكون محسوب عطرف أو شي مذهب تـ
تلاقي شغل، تحقك حلم، ترفع راس أهلك
ما بتتوفر هالأشياء الحياة ما بتضحكلك
رح تتحقق المطالب عمين عم تضحك؟
معاليك مش عارف مين عم تحكي فسمحلي عرفك
أنا اللبناني
بستأجر بيت، لعيش بالدين، عّتر معي ست أولاد
بدون تياب، لشو الأحلام، قلب قرفان من الألوان
عيّش معي بنت الناس بهالقرشين بهالزنزانة احلم عمّر منها بيت
تإرجع بالانتخابات، انزل ورا البرداية
اركض ورا نفس الناس، اركع لذات التاج
انسى كل شي تمنيت،صدق نفس الكذبات
عصّب قول اكتفيت، وارجع اتظاهر لكل هيدي الاسباب
لي دمو بارد بطّل يحمل صار بدو عصيان
وعيتو المارد من نومة قتلت كل الأحلام
أكتر من ألوانو هيدا العلم ما بيساع
بلبنانك أنت تصرّف بس لبناني ما بينباع
عشنا 40 سنة الحروب لي بلشتوها
مع المال واسم العيلة والصيت ورتّوها
التنين رسمالن جملة، عنوان كتابو النخبة
لبنان بنفس اللعنة، وجهين لنفس العملة
