هو انتي لسه زي عادتك
جوه اوضتك فاتحه فيسك بس ساكته
جمب منك مج قهوه نصه فاضي
كل شئ اصبح معادي للبراءه اللي في عيونك
شخص جاهل اللي حبك بعدها فكر يخونك
انتي تستاهلي الحياه وشخص فعلا راح يصونك
كونه كونك لونه لونك حتي وقت الانبساط
يبقي متحمل جنونك او سكوتك او كلامك
او عياطك كل ليله
حتي وانتي كارهه نفسك هو بيشوفك جميله
قادر يعدل الف ميله من غير ما يزهق او يمل
حتي لو في ميت خناقه عمر ما الخوف يوم يقل
يبقي ضل ميختفيش وان بعدتي يبقي مش عارف يعيش
هو انتي لسه زي عادتك
شايفه كل حاجه حلوه راسمه غنوه وبملامحك
قادره تمحي كتير حاجات
لسه حتي بتقدري تداوي قلبي من سكات
واللي فات من عمري قابلك كوم مشاكل حليته
حتي الجزء المطفي فيا جيتي انتي وحبتيه
لسه صوتك برضو ناعم والانوثه بتجري فيه
حتي برضو جمال عيونك كله هيموت يوم عليه
طب ولبسك لسه برضو رقيق وهادي
طب خدودك حمرا جدا اهي قصادي
كل حاجه حلوه جمبك لسه برضو بشوفها عادي
هو انتى لسه زى عادتك
بتحبى ميكى، تيمون بومبا
غزل البنات ألوانه قادره تفرحك
بتحبى ناس و بتاخدى فيهم ألف بومبه
و تصدقيهم ثم طيبتك تجرحك
اللي خسرك لما كسرك لسه تايه
مش لاقيله واحده زيك تملا خانة
هو انتى لسه زى عادتك
لسه أمك هى أقرب واحده ليكى
مهما سنك زاد لازلتى طفله بيها
طب أبوكى حضنه دافى بيداريكى
أختك المجنونه شوفتى الحب فيها
طب أخوكى عصبى جدآ بس طيب
غيرته حاميه و رد فعله تمللى تعبك
خوفتى وقت الليل عشان الباشا غيب
قومتى شوفتى ع السرير شيكولاته جمبك
إنتي يا أجمل معني حياه
ممكن كلمة لوجه الله
طيب ضحكه
طيب غمزة
طيب ممكن بس تردي
إنتي حقيقي
إنتي بجد
ممكن يعني تكوني ملاك
او بني ادمة ف شكل ملاك
ولا أميرة من الروايات
طب لو قولنا إنك إنسانه
ماشية إزاي بحلاوتك دي
عارف جدا إني مضايقك
بس كلام كده بيني وبينك
انتي كتير ع البني ادمين
وأنا مش عيل يعني هقولك
وافقي وهغسلك مواعين
بس انا ممكن أقولك مثلا
إني أتمني أشوفك دايما
معني حياه
وأرجع تاني ياحلوة أقولك
ممكن كلمة لوجه الله
مجنونة فضيحه ف ضحكتها
و خجولة ولخمه وحد مدب
تركيبة عجيبه ف حقيقتها
بنت ف جملها أكيد تتحب
