في كل لفة عقرب ساعة عمري بيتسرسب بيعدي
الناس والدنيا بتتغير، حتى الحديد بيصدي
وأنا الوحيد واقف مكاني ثابت
في ناس إختارت سكة صابت، ناس تانية إختارت سكة خابت
إحساس قاسي وصعب لمّا الناس تشوفك فاشل
أبوك وأمك وإخواتك وأصحابك شايفينك عاطل
قوم يابني إسعى وحاول"، والله غلبت أحاول"
ياما حاولت و قبل الجول ما يجي يطلع فاول
ما عنديش مهارة أو حتى كوسة وحوستي حوسة
ودوست بعد آخر البنزين بدوسة
في كل مقابلة شغلانة يتقالي لف نفسك بشهادتك
مدد بجنب أي حيط وخدلك بوسة
رجعت فلاش باك حسبت سنين عمري تلاتين سنة لقيت
حسبت تاني وتالت وإتخضيت
ببص في المراية كام شعراية بيضا لقيت
وأبويا هو اللي لسه بيصرف على البيت
بتعامل من عيلتي على إني عالة وحالتي حالة
ثقتي بنفسي راحت النجاح بقى إستحالة
نفسي أهرب من نفسي ومن حالتي ومن عيلتي ومن الدنيا
نفسي ألقى دنيا تانية أهرب ليها لو حتى ثانية
وفي يوم قالهالي صاحبي واللي يدلك على الطريق
ما يفيدش صاحب غير صاحبه، إسمع من الصديق
قالي في قعدة ضرب حلوة بالليل عاملينها
"سألته: "هاش؟" ضحك، قالي "بيسة" قولتله "لا أدمنها
"قالي: "ما تخافش، مش ممكن تدمن من أول شكة
أقنعني، بالليل فعلاً شككني أول شكة
مفاصلي ساحت وإرتاحت وروحي راحت
بكلم نفسي من جوة وبرغي ومن برة ساكت
همومي شبه تاهت والرؤية باهت في باهت
كل مشكلة كانت عندي في الدنيا ماتت وتاهت
عدّت ساعات في ثانية لقيت الصحبة قايمة
دخلت بيتي وش الفجر عيلتي كانت نايمة
دفنت نفسي تحت البطانية جسمي متلج
نمت في أقل من ثانية نومة واحد متبنج
قطر الحياة بيعدي بسرعة، سنة في سنة في سنة
وأنا زي ما أنا من لما كان عندي سنة
هي هي الحياة، هو هو أنا أنا
زهقت طهقت من الحياة تقدر تقول مليت أنا
صحيت وفقت رجعت تاني للواقع والعكننة
عدّى النهار بطيء كإنه كام شهر وسنة
نفسي النهار يعدي بسرعة وأضرب تاني
أرجع ملك زماني بعيد عن العالم اللي رماني
خلّوني أضرب معاهم كل يوم وبتعزم
خلاص دخلت السكة والطريق بيترسم
فاجئني صاحبي في يوم
قالهالي في وشي خف تعوم
أجيب فلوس منين ليا وليك نضرب كل يوم
شخشخ جيبك يا من قعدتنا دي تكون محروم
من النهاردة مفيش ضرب ببلاش، مفهوم؟ مفهوم
روّحت وتاني يوم في معاد الضرب جسمي إتكهرب
كرابيج في ضهري ومناخيري سايلة وبتسرب
عاوز أضرب، منين أجيب فلوس؟ منين أجيب فلوس؟
بدأت أستلف من كل اللي أعرفه وأدوس
وحتى إخواتي خدت منهم ياما فلوس دروس
كله كرهني وبيهرب مني تقلت على النفوس
خمسين جنيه فى خمسين في مية في مية
بسرق يوماتي فلوس من البيت وكله شك فيا
نزلت بعت كل حاجة جاتلي في يوم هدية
خلّصت فلوسي لحد فى يوم ما جاتلي فكرة هي، هي
دهب أمي، موبايل أختي، لاب توب أخويا
سرقتهم نزلت أهرب من البيت وقفني أبويا
حاول يمنعني مسكني من إيدي جامد زقيته
إتخبط في الحيط، و بصلي إزاي إبنه وآذيته
خد مني كل حاجة وتربس الباب غضب
ساعتها طلبت أغرب حاجة ممكن تتطلب
عاوز فلوس حالاً يا إما هرتكب جريمة
إتهمني بالجنون وإداني كام شتيمة
ببان كل الأوض بتتفتح، عيلتي بتتفرج
لسه بيستوعبوا يمكن ده جد يمكن بنهرج
سحبت بنت أختي تلات سنين ناحية شباك
هاتوا الفلوس لا أرميها، فجأة زاد الإرتباك
أمي بكت بحرقة قدامي فقت لثواني
رميتلي فلوس وبصوت عالي، ما أشوفش وشك تاني
أمشي مالكش أم يا أبغض من شيطاني
خدت الفلوس وجريت عارف مش راجع بيتي تاني
قطر الحياة بيعدي بسرعة، سنة في سنة في سنة
وأنا زي ما أنا من لما كان عندي سنة
هي هي الحياة، هو هو أنا أنا
زهقت طهقت من الحياة تقدر تقول مليت أنا
خسرت كل أهلي وأصحابي بقيت وحيد
ومنين هجيب فلوس لازم ألقى طريق جديد
فجأة إفتكرت جار من سني ساكن لوحده طول عمره
أبوه في إعارة برة مصر وشهري فلوس يبعتله
شديته زي ما إتشديت أنا لنفس الطريق
لقيت مصدر فلوس جديد وبيت ولقيت صديق
نضرب سوا بفلوسه و في بيته ومالناش ظهور
شقى سنين أبوه خلص كله في أربع شهور
وفي ليلة بنضرب جاتله مكالمة ما صدقهاش
أبوه عرف إن إبنه بيسرقه وإتنقل الإنعاش
كل عصب في جسمي إتوتر، زودت الجرعة أكتر
الجرعة المعتادة خلاص ما بقيتش تأثر
شريط حياتي بيتعرض قدامي أغبر في أغبر
ضربت السم في عروقي زودته أكتر وأكتر
نفسي أفنى وأخلص من الدنيا زي الميه أتبخر
كمان زودت سِنة جسمي كله إتلون أصفر
صاحبي أتفزع قام وإتسرع، مالك أصفر ليه ياجدع
جسمك عرقان وبتترعش زي اللي من الحية إتلدع
رغم أني غرقان في العرق، جسمي متلج موجوع وجع
من خضتي جيت أصلب طولي، جسمي على الأرض إترزع
جسمي رافض لكل أمر مني القوة إتهدت
والدنيا بتضلم تدريجي وواحدة واحدة إسودت
آخر لقطة في حياتي شفتها كانت مأساة
صاحبي مرعوب وبيراقب فراقي للحياة
قطر الحياة بيعدي بسرعة، سنة في سنة في سنة
وأنا زي ما أنا من لما كان عندي سنة
هي هي الحياة، هو هو أنا أنا
زهقت طهقت من الحياة تقدر تقول مليت أنا
عمري بسرعة إنتهى
رجعت شريط حياتي ما لقيتش فيه حاجة عدلة تتذكرلي عملتها
حياتي راحت مني كلها ضيعتها
ندمان على كل لحظة غامقة في يوم أنا عشتها
ياربّ إديني فرصة تاني أرجع للحياة
همشي في طريقي صح لحد آخر منتهاه
دي حاجة صعبة فعلاً إنك تختفي من الدنيا
والناس ما تفتكركش بحاجة حلوة لوجه الله
