هند العطا وايقونة دبي اشهد
يا ام الشيوخ وتاج عز على الراس
انتي على ما قال شيخي محمد
قدوة عطا يا اقرب الناس للناس
يمناك بالمعروف والخير تمتد
عزوه وقدوه للمعالي ونبراس
قلبك كبير وطيبتك ما لها حد
بحر الندى اللي ماله حدود وقياس
سمحة جناب ولا شكى قاصدك صد
وتشاركين الناس بشعور واحساس
ريف اليتيم اللي ربى ما معه حد
وباب الامل للى شكى ضيقة الياس
لو هو لفى ( زعبيل ) والحيل منهد
بيرد من ( زعبيل ) ما يشتكي باس
نبعك اصيل وعد يا منبع العد
وظلك ظليل ومعدنك طيب الساس
تاريخ ميلادك يسجل وينعد
والمجد صوت وصفحة الكون كراس
عمرك بعمر دبي والمجد ممتد
عطره دهن عودك وتاجه من الماس
نفخر ونتشرف باسمج ونعتد
يا رمز يتجسد كرامه ونوماس
لانك رفيقة درب لي شيد المجد
وام الشيوخ اللي للامجاد حراس
