إِسمِك يَا عَدرَا بيِنكَتَب
عَ القَلبْ بِ حرُوف الدَّهَب
بَحرِ النِّعم عَ النَّـــــــــــــاس
منِ حـرُوف إِسمِك يِنسَكَب
حملتي الوَجَع وكلِّ الوجع
وهموم ما بتنقاس
يَـــــــا مَريَم وقِفتي
بـإِيدِك تضِمِّيـنَا
عَ بلادنَا التِفتِي
وضَوِّي الأَمَل فِينا
تَوبِـــك الأزرَق لّي حَمى
إيَّــــــــــامنَا وطَفّى الجَمِر
هَالتَّوب شَقفِي منِ السَّما
مشلوح عَ كتَافِك غُمُر
والأَبيَض الزَّنبـــق سِقِي
كل درب عم يرشح صَلا
يَا رخَــــامِة الطِّهرِ النَّقِي
يَا نهَار بِالمجدِ انـتَلَى
ولادِك يـــــــا عَدرَا ضمِّيُن
دَقّـــات قلبِك يِسمَعُو
إِخوِي وعَ طُول بتحمِـيُن
عيُونُن لَ صَوبِك يِرفَـعُو
لْ سَهرِة مَحَـبِّي بعَتِّــــــــيُن
فِضيُو الخَــوَابي توَجَّـــــعُو
قُولي ليَسـُـوع يْعَــبِّيُن
ما فِيه فَرَح إلَّا مَــعو..
شعر: جوزف وديع الشرتوني
موسيقا: أبونا جوزف سويد
توزيع: جاك سرياني
تِسجيل: ستوديو ماريو ناكوزي
