MshaherBio ★ مشاهير بايو

كلمات اغنية ام تي ام – AY KALAM

كل يوم بروح البيت تعبان

بحس إن أنا نعسان

ولما بخش السرير وأنام

بشوف أحلام أوهام

أي كلام في الأحلام

أنا فاكر فى يوم صحيت من النوم

طلعت أجري على التليفون

كلمت مايكي مش موجود

كلمت تاكي لقيته مخمود

رحت داخل أعمل فطار

إديتها فول بالزيت الحار

خلى بقي مشعلل نار

رحت شارب كاس فوار

ودخلت لأمي أعمل حوار

عايز الكار أروح المطار

في واحد صاحبي طيار

جاي من كفر الدوار

قالتلي مش ناقصة هزار

دا إنت لسه خابط حمار

وحظك ما طلعش صعيدي

وأهله ما أخدوش بالتار

قلتلها ماشي ورحت ماشي

وقعدت أدعي على المواشي

وفي الجرنان لقيت خبر

جنون البقر مازال متفاشي

وتلاشي شعب فلسطين

ومنتخبنا خسر من مين

وفي الأخر حظي يقولي

كلة تمام لأ كله سليم

كل ليلة لما أنام

في الأحلام بشوف أوهام

ومش عارف دي حقيقة ولا دا أي كلام

كل ليلة لما أنام

في الأحلام بشوف أوهام

ومش عارف دي حقيقة ولا دا أي كلام

قاعد في أوضتي بحضر جن

فجأة سمعت جرس بيرن

مين في الوقت دا جاى يزن

دا أكيد مايكي رايح الچيم

الحديد مش قادر أشيله

ومايكي بيشيل 100 كيلو

قلت لأمي قومي إفتحيله

هخلص اللي في إيدي وأجيله

"إيه دا إيه دا"

"دا عفريت بجد دا ولا إيه"

"لا لا لا"

"عفريييت"

قرصت نفسي، دعكت عينيا

عفريت طلعلي بقى بين إيديا

قعدت أفكر شوية هي

تبقى إيه أول أمنية

أول حاجة جت على بالي

فلسطين فى الوضع الحالي

إسرائيل خليتها تلالي

قلت للعفريت شيلهالي

لا عايز فلوس ولا عايز قصر

أصل ديونا مالهاش حصر

قلت للعفريت سددها بس إبقى هاتلي بيهم وصل

وشوف بقى إيه أخر أمنية

دي أكيد حاجة هتبقى ليا

خلصت فترة الصلاحية

والنبي هاتلي كارت بـ 100

كل ليلة لما أنام

في الأحلام بشوف أوهام

ومش عارف دي حقيقة ولا دا أي كلام

كل ليلة لما أنام

في الأحلام بشوف أوهام

ومش عارف دي حقيقة ولا دا أي كلام

قاعد في البلكونة بتشمس

باكل جبنة وفول مدمس

بشرب شاي بإيدي الشمال وبالإيد التانية بغمس

بصيت من البلكونة لقيت

عيال واقفة تحت البيت

ماسكين واحد جنب الحيط

منظر خلاني إتربيت

ولما واحد طلع مطوة، خلاني بقيت قلقان

قلت لازم آخد خطوة، لازم أكلم سوبر مان

طلعت أجري على الصالون

رفعت سماعة التليفون

فجأة سمعت التليفزيون

دا مذيع كورة بيقول جون

ودى واحدة من المسابقات

وأنا عن نفسي ماليش في الكورة

هفضل أدفع مكالمات وأمي تزعق على الفاتورة

كل ليلة لما أنام

في الأحلام بشوف أوهام

ومش عارف دي حقيقة ولا دا أي كلام

كل ليلة لما أنام

في الأحلام بشوف أوهام

ومش عارف دي حقيقة ولا دا أي كلام


اغاني مشابهة

Advertisement