انا ابويا واحشني جدا
محتاج رأيه في حاجات
اهملت في سؤاله عني
وماجاش من يوم ما مات
نضارته وساعته لسه
عالرف مكان ما سابهم
وهدومه جوه كيسهم
وجداد من يوم ما سابهم
نفسي اتكلم معاه
واحكيله عاللي تم
وحقوله مين في مرضة
زاره ونقله دم
وحقوله اني اسف
علشان خبيت عليه
وأحلفله اني نفسي
لو يوم المس ايديه
انا عارف انه سامع
متأكد انه حس
ماهو برده الموت لايمكن
يقتل في الناس شعورها
ومافيش في الدنيا شجرة
تقطعها من جزورها
ومافيش في الدنيا راحل
الا وسايب وراه
واحد من صلبه شبهه
يدعيله في الصلاة
انا ابويا وحشني جدا
واحشاني معاه حاجات
بطلت اعملها واحدي
من ساعة لما مات
