يارب أنا خايف ..

يجوني يفتشوا ..

قوم يقفشوا ويايا صفر على الكمين ..

لو يفتحوا قلبي ..

ف يلقوا الناس مشوا ..

أو يقلبوا مخي فيلقوه أسبرين ..

غرقان ف بحر منبهات

يارب أنا راجل على دستة بنات

لكني أضعف من نبات

مالقاش ف يوم سقا ..

يارب أنا عمارة ألم

مفيهاش ولا شقة

فارفع عن الذنب القلم

واديني كام زقة ..

بدعيك دعا عيل إذا ضحكوا عليه ف الفصل

وادعيك دعا طالب إذا جاله جواب الفصل

وادعيك دعا المزنوق إذا باعوه بقلة أصل

وأدعيك بصوت مخنوق عشان مرضي مالوش ولا مصل

الدنيا هنا ضيقة والقلب متكبل

ف البعد عنك شقا والكل بيهبل

بدعيك ونفسى ألاقيك

ف الضلمة والشبابيك

ف ادعيك عشان ادعيك

يارب تتقبل ..